લીંબડી તાલુકાના નાની કઠેચી ગામે લોકમેળા (Fair) દરમિયાન ભિક્ષાવૃત્તિ (Begging)ના વિસ્તાર બાબતે અમદાવાદ અને સુરેન્દ્રનગરના કિન્નર જૂથો વચ્ચે હિંસક અથડામણ સર્જાઈ હતી.
સાતમ-આઠમના આ મેળામાં સુરેન્દ્રનગરના કિન્નરો ભિક્ષાવૃત્તિ કરી રહ્યા હતા, ત્યારે અમદાવાદથી કાર અને ઓટો રિક્ષામાં આવેલા 10થી વધુ કિન્નરોએ લોખંડના પાઇપ અને ધોકા વડે હુમલો કર્યો હતો. આ ઘટનામાં સોનાની ચેઇન અને રોકડ રકમની લૂંટ ચલાવવામાં આવી હોવાનો પણ આક્ષેપ કરાયો છે.
આ હિંસક હુમલામાં સુરેન્દ્રનગરના 3 કિન્નરોને હાથ ભાંગી જવા સહિત ગંભીર ઇજાઓ પહોંચતા તેમને સારવાર અર્થે સુરેન્દ્રનગરની સિવિલ હોસ્પિટલ (Civil Hospital Surendranagar) ખસેડાયા છે.
ઉલ્લેખનીય છે કે, હકની હદ બાબતે બંને જૂથો વચ્ચે છેલ્લા 8 મહિનાથી વિવાદ ચાલી રહ્યો છે અને આશરે 11 મહિના પહેલાં પણ આવો જ હુમલો થયો હતો.
મેળામાં પોલીસ, હોમગાર્ડ અને જીઆરડીનો બંદોબસ્ત હોવા છતાં બનેલી આ ઘટનાથી ભયનો માહોલ છવાયો છે. પીડિતોએ પોલીસ સમક્ષ કડક કાનૂની કાર્યવાહી અને ન્યાય આપવાની માગ કરી છે.
