Dholeshwar Mahadev Temple | પવિત્ર શ્રાવણ મહિનાના અંતિમ સોમવારે સુરેન્દ્રનગર ખાતે આવેલા પૌરાણિક અને સ્વયંભૂ ધોળેશ્વર મહાદેવના મંદિરે ભક્તોનું ભારે મહેરામણ ઉમટી પડ્યું હતું. શ્રાવણના છેલ્લા સોમવારનું વિશેષ મહત્વ હોવાથી વહેલી સવારથી જ શ્રદ્ધાળુઓ ઉત્સાહભેર દાદાના દર્શન અને શિવપૂજા કરી ધન્યતા અનુભવી રહ્યા છે.
ઉલ્લેખનીય છે કે, સૌરાષ્ટ્ર અને કચ્છના 500 થી વધુ ગામોને પીવાનું પાણી પૂરું પાડતા પ્રસિદ્ધ ધોળીધજા ડેમનું નામકરણ આ ધોળેશ્વર મહાદેવના નામ પરથી જ થયું હોવાની લોકવાયકા છે. પહેલાં આ મંદિર ડેમના કાંઠે આવેલું હતું, પરંતુ હવે તે ડેમની મધ્યમાં બિરાજમાન છે, જ્યાં ભક્તો ડેમના માર્ગેથી પસાર થઈને દર્શનાર્થે પહોંચે છે.
અંતિમ સોમવાર નિમિત્તે મંદિરમાં ભક્તિ, ભજન અને ભોજનનો ત્રિવેણી સંગમ જોવા મળ્યો હતો. આસપાસના 20 થી વધુ ગામોમાંથી હજારો ભક્તો મહાદેવજીના આશીર્વાદ લેવા માટે આવી રહ્યા છે.
આ પવિત્ર દિવસે શિવલિંગને મનોહર ફૂલોનો શણગાર કરવામાં આવ્યો છે. આ ઉપરાંત ચાર પ્રહરની વિશેષ આરતી, દીપમાળા, પવિત્ર યજ્ઞ, મહાપ્રસાદ અને વિવિધ ધાર્મિક કાર્યક્રમોનું સુંદર આયોજન કરવામાં આવ્યું છે. મંદિર પટાંગણમાં દોરેલી ભવ્ય ફૂલોની રંગોળી આકર્ષણનું કેન્દ્ર બની છે.
મંદિરના પૂજારી ગૌસ્વામી ગુણવંતભાઈના જણાવ્યા અનુસાર, આજના આ વિશેષ દિવસે 5000 થી વધુ ભક્તો દાદાના દર્શનનો લાભ લેશે. આખા શ્રાવણ માસ દરમિયાન મંદિરમાં ફૂલોની મનોરમ રંગોળી પૂરવામાં આવી હતી, જેને જોવા માટે દૂર-દૂરથી લોકો આવતા હતા.
શ્રદ્ધાળુઓ પહેલાં ડેમના પવિત્ર જળમાં સ્નાન કરે છે અને ત્યારબાદ સ્વયંભૂ ધોળેશ્વર મહાદેવના દર્શન કરી મનની શાંતિ મેળવે છે. સમગ્ર શ્રાવણ માસ દરમિયાન શિવભક્તિના અનોખા માહોલ સાથે આજે અંતિમ સોમવારે મંદિર પરિસરમાં ભારે હરખ અને ઉલ્લાસ છવાયેલો જોવા મળ્યો હતો.
