લખતરમાં ગેસ એજન્સી પર સિલિન્ડર લેવા માટે ગ્રાહકોની ભારે ભીડ જોવા મળી રહી છે. ઓનલાઈન ગેસ સિલિન્ડર બુકિંગમાં ટેકનિકલ ખામી સર્જાતા અને OTP ન આવતા હોવાથી લોકો મુશ્કેલીમાં મુકાયા છે.
આ સમસ્યાના કારણે જૂના બુકિંગ ધરાવતા ગ્રાહકોને જ હાલ સિલિન્ડર આપવામાં આવી રહ્યા છે, જેના કારણે નવા ગ્રાહકોમાં રોષ જોવા મળી રહ્યો છે.
જિલ્લા પુરવઠા વિભાગે સ્પષ્ટતા કરી છે કે જિલ્લામાં ઘરેલુ LPG ગેસનો પૂરતો જથ્થો ઉપલબ્ધ છે, તેથી ગ્રાહકોએ ગભરાઈને સંગ્રહખોરી કરવી નહીં. તકેદારીના ભાગરૂપે બે સિલિન્ડરના બુકિંગ વચ્ચે 25 દિવસનો ફરજિયાત ગાળો રાખવા અપીલ કરાઈ છે. બુકિંગ વ્યવસ્થા ખોરવાતા વૃદ્ધો, મહિલાઓ અને નોકરિયાત વર્ગના લોકો કલાકો સુધી લાઈનમાં ઊભા રહેવા મજબૂર બન્યા છે.
