સુરેન્દ્રનગર: રૂ. 3.30 લાખનો ચેક રિટર્ન થતા જોરાવરનગરના શખ્સને 1 વર્ષની કેદની સજા

સુરેન્દ્રનગરની ચીફ જ્યુડિશિયલ મેજિસ્ટ્રેટ કોર્ટે ચેક રિટર્ન કેસમાં મોટો ચુકાદો આપતા આરોપીને 01 વર્ષની સાદી કેદની સજા ફટકારી છે.

આ કેસની વિગત મુજબ, જોરાવરનગરના રહેવાસી હાર્દિકભાઈ છગનભાઈ પરમારે વર્ષ 2023 માં શાંતા શોપ ઇન્ડસ્ટ્રીઝના હાર્દિક જીતેન્દ્રકુમાર વોરાને મિત્રતાના દાવે ધંધા માટે રૂ. 3.30 લાખ હાથ ઉછીના આપ્યા હતા.

આ રકમ પેટે આપવામાં આવેલો ચેક વર્ષ 2024 માં બેંકમાં જમા કરાવતા ખાતામાં પૂરતું બેલેન્સ ન હોવાને કારણે બાઉન્સ થયો હતો.

ફરિયાદીએ વકીલ મારફતે નોટિસ પાઠવવા છતાં રકમ પરત ન મળતા જૂન 2024 માં કોર્ટના દ્વાર ખખડાવ્યા હતા. આ કેસની સુનાવણી દરમિયાન રજૂ કરવામાં આવેલા દસ્તાવેજી પુરાવા અને દલીલોને ગ્રાહ્ય રાખીને કોર્ટે હાર્દિક જીતેન્દ્રકુમાર વોરાને દોષિત જાહેર કર્યા છે.

સજાની સાથે કોર્ટે એવો પણ હુકમ કર્યો છે કે આરોપીએ ફરિયાદીને વળતર પેટે રૂ. 3.30 લાખની રકમ પણ ચૂકવવાની રહેશે. ચેક રિટર્ન કેસમાં કોર્ટના આ કડક વલણથી લેણદારોમાં ન્યાયની આશા જાગી છે.