Tarnetar fair | કંકુવરણી પાંચાળની ભોમકા પર જગવિખ્યાત તરણેતરના ભાતીગળ લોકમેળાનો નાયબ મુખ્ય દંડક જગદીશ મકવાણા, ધારાસભ્ય શામજી ચૌહાણ, કલેક્ટર ગુણવંતસિંહ સોલંકી, ડીડીઓ કે.એસ. યાજ્ઞિક અને એસપી પ્રેમસુખ ડેલુ સહિતના મહાનુભાવોની ઉપસ્થિતિમાં વિધિવત શુભારંભ થયો છે.
ભગવાન ત્રિનેત્રેશ્વર મહાદેવનું પૂજન-અર્ચન કરીને મેળાને ખુલ્લો મૂકવામાં આવ્યો છે. આ પ્રસંગે પદ્મશ્રી શાહબુદ્દીન રાઠોડ, અશોકસિંહ રાણા અને પ્રતાપ ખાચર પણ ઉપસ્થિત રહ્યા હતા. તમામ મહાનુભાવોનું પરંપરાગત કોટી અને પુષ્પગુચ્છથી સ્વાગત કરાયું હતું.
માહિતી વિકાસ પ્રદર્શન અને પશુ પ્રદર્શન પણ ખુલ્લા મુકાયા હતા. આસ્થા અને પરંપરાનો મહાસાગર ગણાતા આ મેળામાં ગુજરાત, દેશભર તેમજ વિદેશથી પણ પ્રવાસીઓ અને શ્રદ્ધાળુઓ ઉમટી રહ્યા છે. પ્રવાસન, સાંસ્કૃતિક અને રમતગમત વિભાગો દ્વારા સરકારી યોજનાઓના સ્ટોલ ઊભા કરવામાં આવ્યા છે.
જોકે, છેલ્લા બે દિવસથી સૌરાષ્ટ્ર અને ગુજરાતમાં વરસતા સાર્વત્રિક વરસાદ તથા ઋષિ પંચમીના સંયોગ વચ્ચે રાત્રે પડેલા ભારે વરસાદને કારણે મેળાના ગ્રાઉન્ડમાં પાણી ભરાયાં છે અને કીચડનું સામ્રાજ્ય છવાયું છે.
વરસાદી વિઘ્નને કારણે પ્રથમ દિવસે અંદાજિત 2,00,000 થી વધુ લોકોની સામે માત્ર 20,000 થી 30,000 લોકોની પાંખી હાજરી જોવા મળી છે. ખેલાડીઓને ઈજા ન થાય તે માટે પ્રથમ દિવસે ગ્રામીણ ઓલમ્પિક રદ્દ કરાઈ છે.
લાડવા ખાવાની સ્પર્ધા, ખોખો, રસાખેંચ, કબડ્ડી, 400 મીટર દોડ, ગોળાફેંક, લંગડી અને ભાલાફેંક જેવી રમતો સ્થગિત કરાઈ છે, જે કાલથી મશીનરીથી ગ્રાઉન્ડ સાફ કરી શરૂ કરાશે.
પશુઓને ઈજાગ્રત ન થાય તે માટે પશુ હરીફાઈ અને સુરક્ષાને ધ્યાનમાં રાખી રાઇડ્સ પણ પ્રથમ દિવસે બંધ રાખવામાં આવી છે. ઋષિ પંચમીના દિવસે વરસાદ વરસવાની લોકવાયકા આ વર્ષે પણ સાર્થક સાબિત થઈ છે, જે ખેડૂતો અને પશુઓ માટે આશીર્વાદરૂપ છે.
તેમ છતાં, સંસ્કૃતિ અને ભુલાતા જતા વાજિંત્રોની યાદો તાજી કરતા સાંસ્કૃતિક કાર્યક્રમો ધમધમી રહ્યા છે. જિલ્લા યુવા વિકાસ અધિકારી ભરતસિંહ ગોહિલના જણાવ્યા અનુસાર, મુરલી, રાવણહથ્થુ, ઢોલક, તબલા, મંજીરા, ડાકલા અને ડમરુ જેવા લુપ્ત થતા વાજિંત્રોના કલાકારોએ પ્રદર્શન કરી ઈનામો મેળવ્યા છે.
કાલથી ગાયન સ્પર્ધા અને ત્રીજા દિવસે પ્રસિદ્ધ હુડો રાસ મંડળી નૃત્ય સ્પર્ધા યોજાશે. તંત્ર દ્વારા માટી-કીચડ દૂર કરી આગામી દિવસોમાં મેળાને પૂરું જોશ આપવા સઘન તૈયારીઓ કરાઈ છે. પોલીસ અને વહીવટી તંત્ર ખડેપગે સુરક્ષા પૂરી પાડી રહ્યું છે.
