ધ્રાંગધ્રાના વાવડી ગામની સીમમાં પોલીસનો દરોડો: 300 લિટર દેશી દારૂનો આથો ઝડપાયો

ધ્રાંગધ્રા તાલુકા પોલીસ દ્વારા પ્રોહિબિશન કામગીરી અંતર્ગત વાવડી ગામમાં સફળ દરોડો પાડવામાં આવ્યો છે. પોલીસ સ્ટાફ જ્યારે વિસ્તારમાં પેટ્રોલીંગ કરી રહ્યો હતો, ત્યારે બાતમી મળી હતી કે વાવડીથી મોટી માલવણ ગામ તરફ જવાના રસ્તે સીમમાં દેશી દારૂ બનાવવાની ગેરકાયદેસર પ્રવૃત્તિ ચાલી રહી છે.

આ ચોક્કસ બાતમીના આધારે પોલીસ ટીમ દ્વારા રેઇડ કરવામાં આવતા ઘટનાસ્થળેથી દેશી દારૂ બનાવવાનો 300 લિટર આથો મળી આવ્યો હતો. પોલીસે આશરે 7500 રૂપિયાની કિંમતનો મુદ્દામાલ જપ્ત કરી આગળની કાર્યવાહી હાથ ધરી છે. જોકે, દરોડા દરમિયાન આરોપી મુન્નાભાઈ જાદુભાઇ મુલાડીયા હાજર મળી આવ્યો ન હતો, જેથી પોલીસે તેની વિરુદ્ધ પ્રોહીબીશન એક્ટ હેઠળ ગુનો નોંધી તેને પકડવા માટેના ચક્રો ગતિમાન કર્યા છે.