ધ્રાંગધ્રા શહેરમાં પ્રોહિબિશનની પ્રવૃત્તિઓને નાબૂદ કરવા માટે સીટી પોલીસ દ્વારા હાથ ધરવામાં આવેલા સઘન પેટ્રોલિંગ દરમિયાન એક મોટી સફળતા મળી છે.
પોલીસને ચોક્કસ બાતમી મળી હતી કે પુનિતનગર વિસ્તારમાં આવેલા એક રહેણાક મકાનમાં વિદેશી દારૂનો મોટો જથ્થો છુપાવવામાં આવ્યો છે. આ બાતમીના આધારે ઇન્ચાર્જ PSI અને તેમની ટીમે તાત્કાલિક તે મકાન પર ત્રાટકીને સર્ચ ઓપરેશન હાથ ધર્યું હતું.
પોલીસની તપાસ દરમિયાન મકાનમાંથી વિવિધ બ્રાન્ડની ઈંગ્લીશ દારૂની કુલ 3327 બોટલો અને બિયરના 240 ટીન મળી આવ્યા હતા. પોલીસે અંદાજે 2,53,492 રૂપિયાની કિંમતનો આ મુદ્દામાલ જપ્ત કર્યો છે. જોકે, દરોડા દરમિયાન આરોપી ધર્મેન્દ્રસિંહ ઉર્ફે ધમભા મનુભા જાડેજા પોલીસના હાથે લાગ્યો ન હતો અને તે ફરાર થઈ ગયો હતો. હાલમાં પોલીસે આરોપી વિરુદ્ધ પ્રોહિબિશન એક્ટ હેઠળ ગુનો નોંધી તેને ઝડપી પાડવા માટેના ચક્રો ગતિમાન કર્યા છે.
