સુરેન્દ્રનગર જિલ્લાના ધ્રાંગધ્રા શહેરમાં કાયદો અને વ્યવસ્થા જાળવવા માટે પોલીસ દ્વારા સઘન પેટ્રોલિંગ હાથ ધરવામાં આવ્યું છે. આ દરમિયાન ધ્રાંગધ્રા સિટી પોલીસ મથકના સર્વેલન્સ સ્ટાફે જિલ્લા મેજિસ્ટ્રેટના હથિયારબંધી જાહેરનામાનો ભંગ કરનાર એક શખ્સની ધરપકડ કરી છે. શહેરના મોચીવાડ વિસ્તાર નજીકથી શંકાસ્પદ હાલતમાં પસાર થઈ રહેલા હસુભાઈ ગાંડાભાઈ સોલંકી નામના વ્યક્તિને પોલીસે અટકાવી તેની તલાશી લીધી હતી.
તલાશી દરમિયાન હસુભાઈ પાસેથી તીક્ષ્ણ છરી મળી આવી હતી. ઉલ્લેખનીય છે કે, જિલ્લામાં હાલ હથિયારબંધીનું જાહેરનામું અમલમાં હોવા છતાં તેનું ઉલ્લંઘન કરી હથિયાર રાખવા બદલ પોલીસ દ્વારા કાયદેસરની કાર્યવાહી કરવામાં આવી છે. આ કામગીરીમાં ધ્રાંગધ્રા સિટી પોલીસના સરફરાજભાઈ મલેક, પ્રતિપાલસિંહ ઝાલા, ધીરુભા પરમાર અને હીનાબેન સહિતના કર્મચારીઓ જોડાયા હતા.
પોલીસે આરોપી હસુભાઈ વિરુદ્ધ જાહેરનામા ભંગનો ગુનો નોંધી છરી કબજે કરી છે. પોલીસના જણાવ્યા મુજબ, અસામાજિક તત્વોમાં ફફડાટ ફેલાવવા અને ગુનાખોરીને અટકાવવા માટે આગામી દિવસોમાં પણ આ પ્રકારે ઓચિંતી અંગઝડતી અને વાહન ચેકિંગની ઝુંબેશ ચાલુ રાખવામાં આવશે. હાલમાં પકડાયેલા શખ્સ વિરુદ્ધ ગુનો દાખલ કરી જેલના સળિયા પાછળ ધકેલી દેવામાં આવ્યો છે.
