ધ્રાંગધ્રા હાઇવે પર ટ્રકમાંથી 4.90 લાખનો ગાંજો ઝડપાયો, 2 શખ્સોની ધરપકડ

કચ્છ-અમદાવાદ હાઇવે પર નશીલા પદાર્થોની હેરાફેરી અટકાવવા ધ્રાંગધ્રા તાલુકા પોલીસની ટીમે સફળ ઓપરેશન પાર પાડ્યું છે. બાતમીના આધારે કુડા ચોકડી નજીક વોચ ગોઠવીને પોલીસે એક શંકાસ્પદ ટ્રકને અટકાવી હતી.

તલાશી દરમિયાન ટ્રકમાંથી 9.810 કિલો સૂકો ગાંજો મળી આવ્યો હતો, જેની બજાર કિંમત આશરે 4,90,500 રૂપિયા આંકવામાં આવી છે. આ કેસમાં પોલીસે ભચાઉના રહેવાસી શાદાતહુશેન અકબરશા સૈયદ અને સુલેમાન ઉસ્માનભાઈ શેખને સ્થળ પરથી ઝડપી પાડ્યા છે.

પોલીસે ગાંજાનો જથ્થો, મોબાઈલ ફોન અને ટ્રક સહિત કુલ 14,95,500 રૂપિયાનો મુદ્દામાલ કબજે કર્યો છે. પ્રાથમિક તપાસમાં ભચાઉના અહેમદ ઉર્ફે પપ્પુ રજાકભાઈ લંઘા અને અન્ય એક અજાણ્યા શખ્સનું નામ ખુલતા કુલ 4 આરોપીઓ વિરુદ્ધ નાર્કોટિક્સ એક્ટ (NDPS) હેઠળ ગુનો નોંધવામાં આવ્યો છે.

હાઇવે પર નશીલા પદાર્થોના નેટવર્કને તોડવા માટે પોલીસ હવે આ જથ્થો ક્યાંથી લાવવામાં આવ્યો હતો અને કોને સપ્લાય કરવાનો હતો તે દિશામાં સઘન તપાસ ચલાવી રહી છે.