ધ્રાંગધ્રાના ગોપાલગઢની સીમમાં રૂ. 1.57 લાખનો વિદેશી દારૂ ઝડપાયો

સુરેન્દ્રનગર જિલ્લાના ધ્રાંગધ્રા તાલુકા પોલીસ મથકના સર્વેલન્સ સ્ટાફ દ્વારા પ્રોહિબિશનની પ્રવૃત્તિઓ ડામવા માટે સઘન પેટ્રોલિંગ હાથ ધરવામાં આવ્યું હતું.

આ દરમિયાન પોલીસને ચોક્કસ બાતમી મળી હતી કે ગોપાલગઢ ગામની સીમ વિસ્તારમાં મોટા પાયે વિદેશી દારૂનો જથ્થો છુપાવવામાં આવ્યો છે. બાતમીના આધારે પોલીસે ત્વરિત કાર્યવાહી કરી નિર્ધારિત સ્થળે રેઇડ પાડતા અલગ-અલગ બ્રાન્ડની ઇંગ્લિશ દારૂની 143 નંગ બોટલો મળી આવી હતી.

પોલીસે ઘટનાસ્થળેથી કુલ 1,57,300 રૂપિયાની કિંમતનો મુદ્દામાલ કબજે કર્યો છે. જોકે, આ દારૂનો જથ્થો છુપાવનાર મુખ્ય શખ્સ રાજેશ પ્રેમજીભાઈ રાણેવાડિયા પોલીસની રેઇડ દરમિયાન હાજર મળી આવ્યો ન હતો.

ધ્રાંગધ્રા પોલીસે ફરાર આરોપી વિરુદ્ધ પ્રોહિબિશન એક્ટ હેઠળ ગુનો નોંધી તેને ઝડપી પાડવા માટેના ચક્રો ગતિમાન કર્યા છે. ગ્રામ્ય વિસ્તારોમાં છુપાયેલા દારૂના નેટવર્કને તોડવા માટે પોલીસ દ્વારા આગામી દિવસોમાં પણ આ પ્રકારની આકસ્મિક તપાસ ચાલુ રાખવામાં આવશે તેવી ખાતરી આપવામાં આવી છે.