ધ્રાંગધ્રાના પરોઢિયા વિસ્તારમાં જુગાર રમતા 2 શખ્સ ઝડપાયા, 5 ફરાર

ધ્રાંગધ્રા તાલુકા પોલીસ મથકના સ્ટાફ દ્વારા પેટ્રોલીંગ દરમિયાન પરોઢિયા સીમ વિસ્તારમાં ચાલતા જુગારધામ પર સફળ દરોડો પાડવામાં આવ્યો છે.

પોલીસને મળેલી બાતમીના આધારે સર્વેલન્સ સ્ટાફ દ્વારા કરવામાં આવેલી રેઇડમાં ગુડદી પાસાનો જુગાર રમતા 2 શખ્સો સંજયભાઈ પ્રભુભાઈ નાકિયા તથા માત્રાભાઈ નાનુભાઈ ભરવાડને સ્થળ પરથી ઝડપી લેવામાં આવ્યા છે.

પોલીસે આ કાર્યવાહી દરમિયાન આરોપીઓ પાસેથી 2,350 રૂપિયાની રોકડ રકમ અને 10,000 રૂપિયાની કિંમતના 2 મોબાઈલ ફોન સહિત કુલ 12,350 રૂપિયાનો મુદ્દામાલ કબજે કર્યો છે.

જોકે, રેઇડ દરમિયાન હર્ષદભાઈ સિંધવ, ધમો કિશોરભાઈ ખારબ, ગૌતમભાઈ મેવાડા, જીતુભાઈ અને પ્રિન્સભાઈ નાસી છૂટવામાં સફળ રહ્યા હતા. હાલમાં પોલીસે ઝડપાયેલા 2 અને ફરાર 5 મળી કુલ 7 શખ્સો સામે જુગાર ધારા હેઠળ ગુનો નોંધી કાયદેસરની કાર્યવાહી હાથ ધરી છે.