સુરેન્દ્રનગર જિલ્લાના ધ્રાંગધ્રા ખાતે આવેલી પ્રતિષ્ઠિત DCW કંપનીમાં સોમવારે અચાનક આગ લાગવાની ઘટનાને પગલે અફરાતફરી મચી ગઈ હતી.
કંપનીના પાછળના ભાગમાં લાગેલી આ આગને ઓલવવા માટે સૌપ્રથમ કર્મચારીઓએ પ્રયાસો હાથ ધર્યા હતા, પરંતુ આગે વિકરાળ સ્વરૂપ ધારણ કરતા તાત્કાલિક સ્થાનિક તંત્રની મદદ લેવામાં આવી હતી. જોકે, આ સમગ્ર ઘટના તંત્રની સજ્જતા ચકાસવા માટે આયોજિત કરવામાં આવેલી એક ‘મોકડ્રીલ’ હતી.
આ બચાવ કામગીરીમાં ધ્રાંગધ્રા નગરપાલિકાની ફાયર ફાઈટર ટીમ, ભારતીય આર્મીની બચાવ ટુકડી અને સ્થાનિક પોલીસ કાફલો ગણતરીની મિનિટોમાં સ્થળ પર પહોંચી ગયો હતો. માત્ર 17 મિનિટના ટૂંકા ગાળામાં આગ પર સંપૂર્ણ કાબુ મેળવી લેવામાં આવ્યો હતો.
ઘટનામાં ઈજાગ્રસ્ત થયેલા લોકોને 108 એમ્બ્યુલન્સ મારફતે તાત્કાલિક હોસ્પિટલ ખસેડવાની પ્રક્રિયાનું પણ નિદર્શન કરાયું હતું. આ મોકડ્રીલ દરમિયાન મામલતદાર, ગુજરાત પ્રદૂષણ નિયંત્રણ બોર્ડ (GPCB) અને અન્ય વિભાગના ઉચ્ચ અધિકારીઓ ઉપસ્થિત રહ્યા હતા. સફળ ઓપરેશન બાદ મોકડ્રીલ પૂર્ણ જાહેર થતા કંપનીના સ્ટાફે રાહતનો શ્વાસ લીધો હતો.
