ધ્રાંગધ્રાના ક્લબ રોડ પર ભારે વાહનની ટક્કરે વીજપોલ ધરાશાયી: શોર્ટ સર્કિટ થતા અફડાતફડી

ધ્રાંગધ્રા શહેરના ક્લબ રોડ વિસ્તારમાં વહેલી સવારે એક ભારે વાહનની ટક્કરથી વીજપોલ જમીનદોસ્ત થવાની ઘટના બની હતી. અકસ્માતને પગલે વીજ વાયરોમાં જોરદાર શોર્ટ સર્કિટ થતા આસપાસના રહીશોમાં ગભરાટ ફેલાયો હતો. સદભાગ્યે, આ ઘટના સમયે રસ્તા પર કોઈ હાજર ન હોવાથી મોટી જાનહાનિ ટળી હતી.

ઘટનાની જાણ થતા જ PGVCLની ટીમ તાત્કાલિક સ્થળ પર પહોંચી ગઈ હતી અને સુરક્ષાના ભાગરૂપે વીજ પ્રવાહ બંધ કરી સમારકામ શરૂ કર્યું હતું. વીજપોલ ધરાશાયી થવાને કારણે થોડા સમય માટે ટ્રાફિક વ્યવહાર પણ ખોરવાયો હતો. સ્થાનિક લોકોએ ભારે વાહનોના ત્રાસ સામે રોષ વ્યક્ત કરી તંત્ર પાસે યોગ્ય પગલાં ભરવાની માંગ કરી છે. વીજ વિભાગ દ્વારા નવા પોલ નાખવાની કામગીરી હાથ ધરી પરિસ્થિતિ થાળે પાડવામાં આવી હતી.