ચોટીલા મામલતદાર કચેરીના સ્ટાફને ધમકી આપનાર પ્રતાપ ઉર્ફે લાલો બોરીચા જેલ હવાલે

ચોટીલા મામલતદાર કચેરીની ટીમ જ્યારે ખનિજ ચોરી રોકવા માટે તપાસમાં હતી, ત્યારે તેમની કામગીરીમાં રૂકાવટ કરી ધમકી આપનાર આરોપી પ્રતાપ ઉર્ફે લાલા આપાભાઇ બોરીચાને જેલ હવાલે કરવામાં આવ્યો છે.

આરોપી ખનિજ ચોરીની રેકી કરતો હતો અને કર્મચારીઓ પર નજર રાખી તેમની સાથે માથાકૂટ કરી ગર્ભિત ધમકીઓ આપી હતી. આ ઘટનાને ગંભીરતાથી લઈ ચોટીલા નાયબ કલેક્ટર એચ.ટી. મકવાણા દ્વારા ધરપકડ વોરંટ ઇસ્યુ કરવામાં આવ્યું હતું.

થાનગઢ પોલીસે વોરંટની અમલવારી કરી આરોપીને 13 માર્ચ 2026ના રોજ કોર્ટમાં રજૂ કર્યો હતો. ભારતીય નાગરિક સુરક્ષા સંહિતા 2023ની કલમો હેઠળ સુનાવણી હાથ ધરવામાં આવી હતી.

કોર્ટે આરોપીને 50,000 રૂપિયાના જામીન રજૂ કરવા આદેશ કર્યો હતો, પરંતુ આરોપી જામીન રજૂ ન કરી શકતા તેને લીંબડી સબ જેલ ખાતે મોકલી આપવામાં આવ્યો છે. સરકારી કર્મચારીઓ પર દબાણ લાવનારા તત્વો સામે આ કડક કાર્યવાહીથી વહીવટી તંત્રમાં ગરમાવો જોવા મળી રહ્યો છે.