ધ્રાંગધ્રા નગરપાલિકાના પૂર્વ સુધરાઈ સભ્ય જીવાભાઇ સોલંકીના પુત્રને ત્રણ શખ્સો દ્વારા ધમકી આપી છરી બતાવી 50 હજાર લૂંટી લીધા હતા. બનાવ અંગે પોલીસે ત્રણ શખ્સ સામે ગુનો નોંધી તપાસ હાથ ધરી છે.
ધ્રાંગધ્રા નગરપાલિકાના પૂર્વ સુધરાઈ સભ્ય અને ભાજપ શહેર સંગઠનના વર્તમાન મંત્રી જીવાભાઇ સોલંકીના પુત્ર પ્રતિકભાઇ શહેરની મુખ્ય બજારમાં આવેલ પોતાની ઇલેક્ટ્રિકની દુકાન બંધ કરી પોતાના બુલેટ પર ઘર તરફ જઈ રહ્યાં હતા.
દરમિયાન હરીપર રોડ પર આવેલ રેલવે નાળા પાસે ઉભેલ નિલેશ કાંતિભાઈ રાઠોડ, અશ્વિન લાલાભાઇ સોલંકી તથા વિજય સુરેશભાઈ વાઘેલા દ્વારા હાથમાં છરી અને ધારિયું લઇ યુવકનું બુલેટ અટકાવ્યું હતું. અને બુલેટ ચલાવવાનું બંધ કરી દે તેમ જણાવી ખીસ્સામાં રહેલા રોકડ રૂ.50,000 બળજબરી પૂર્વક કાઢી નાશી છુટયા હતા જ્યારે યુવકે બીકના માર્યા ઘરે જઈ પોતાના ભાઈને આ બાબતની જાણ કરી હતી તે સમયે નિલેશભાઈ કાંતિભાઈ રાઠોડનો ફોન આવ્યો હતો અને જેમ તેમ બોલી જાનથી મારી નાખવાની ધમકી આપી હતી. જેને લઇ ભોગ બનનાર યુવકે ધ્રાંગધ્રા તાલુકા પોલીસ મથક ખાતે ત્રણેય શખ્સો વિરુધ ગુનો નોંધાવતા સ્થાનિક પોલીસે આગળની કાર્યવાહી હાથ ધરી છે.
