રાજુ કરપડા ઓડિયો ક્લિપ વિવાદમાં આપ નેતા વિપુલ ઠાકોરની ધરપકડ

સુરેન્દ્રનગરના રાજકારણમાં ભારે ગરમાવો જોવા મળી રહ્યો છે. આમ આદમી પાર્ટીના પૂર્વ નેતા રાજુ કરપડાની કથિત ઓડિયો ક્લિપ વાયરલ કરવાના મામલે સુરેન્દ્રનગર પોલીસે પાટણ કિસાન સેલના પ્રમુખ અને આપ નેતા વિપુલ ઠાકોરની ધરપકડ કરી છે.

રાજુ કરપડાએ સુરેન્દ્રનગર સાયબર ક્રાઇમ પોલીસ સ્ટેશનમાં ફરિયાદ નોંધાવી હતી કે, તેમને બદનામ કરવા માટે આર્ટિફિશિયલ ઇન્ટેલિજન્સ (AI) નો ઉપયોગ કરીને ખોટી ઓડિયો ક્લિપ બનાવવામાં આવી છે.

આ કેસમાં વિપુલ ઠાકોર ઉપરાંત સ્વયં સાવલી અને કરણ બારોટ સામે પણ ગુનો દાખલ કરવામાં આવ્યો છે. ફરિયાદમાં ઉલ્લેખ કરાયો છે કે, રાજુ કરપડાએ આમ આદમી પાર્ટીમાંથી રાજીનામું આપ્યા બાદ તેમને ખેડૂતોની નજરમાં ‘ગદ્દાર’ સાબિત કરવા માટે આ કાવતરું રચવામાં આવ્યું હતું.

આપના પ્રદેશ નેતાઓ દ્વારા આ ઓડિયો ક્લિપ રજૂ કરીને પ્રેસ કોન્ફરન્સ પણ કરવામાં આવી હતી. પોલીસ તપાસમાં શંકા વ્યક્ત કરવામાં આવી રહી છે કે આ સમગ્ર ઘટના પાછળ પ્રદેશ મહામંત્રી મનોજ સોરઠીયાની સૂચના હોઈ શકે છે.

સુરેન્દ્રનગર લોકલ ક્રાઈમ બ્રાન્ચ (LCB) એ મોડી રાત્રે વિપુલ ઠાકોરની અટકાયત કરી કાયદેસરની કાર્યવાહી હાથ ધરી છે. આ કેસમાં હજુ અન્ય બે આરોપીઓ પોલીસ પકડથી દૂર છે, જેમની ધરપકડ માટે ચક્રો ગતિમાન કરાયા છે. પોલીસ તપાસ બાદ જ સ્પષ્ટ થશે કે આ ઓડિયો ક્લિપ વાસ્તવિક છે કે ખરેખર ટેકનોલોજીનો દુરુપયોગ કરીને બનાવવામાં આવી છે. આ ઘટનાએ સોશિયલ મીડિયા અને રાજકીય વર્તુળોમાં મોટી ચર્ચા જગાવી છે.