Bogus Doctor Caught | ચુડા તાલુકાના છત્રીયાળા ગામે કોઈ પણ પ્રકારની મેડિકલ ડિગ્રી વગર જ હોસ્પિટલ ચલાવતા હિતેશ કિહલા નામના બોગસ ડોક્ટરને સુરેન્દ્રનગર SOG પોલીસે ઝડપી પાડ્યો છે.
આ આરોપી ભાડાના મકાનમાં દવાખાનું ખોલીને છેલ્લા 4 વર્ષથી લોકોના આરોગ્ય સાથે ખુલ્લેઆમ ચેડા કરી રહ્યો હતો.
સ્થાનિક પોલીસ અને આરોગ્ય વિભાગની નિષ્ક્રિયતા વચ્ચે SOG પોલીસે ચોક્કસ બાતમીના આધારે દરોડો પાડ્યો હતો.
આ દરોડા દરમિયાન પોલીસે સ્થળ પરથી રૂ. 15,612 ની કિંમતની એલોપેથિક દવાઓ અને મેડિકલ સાધનોનો મુદ્દામાલ જપ્ત કર્યો છે. કોલેજ સુધી અભ્યાસ કરનાર આ શખ્સ કોઈપણ માન્ય ડિગ્રી વિના દર્દીઓની સારવાર કરતો હોવાનું બહાર આવ્યું છે.
SOG પોલીસે બોગસ ડોક્ટર હિતેશની ધરપકડ કરી તેની સામે ગુનો નોંધી આગળની કાયદેસરની કાર્યવાહી સ્થાનિક પોલીસને સોંપી છે.
