ગુજરાતમાં સ્થાનિક સ્વરાજ્યની ચૂંટણીઓનો માહોલ ગરમાયો છે, ત્યારે ભારતીય જનતા પાર્ટીએ તેની પ્રથમ યાદી જાહેર કરી દીધી છે.
લાંબી પ્રતીક્ષા બાદ ભાજપે સુરેન્દ્રનગર મહાનગરપાલિકાના તમામ 52 ઉમેદવારોના નામની સત્તાવાર જાહેરાત કરીને ચૂંટણી જંગના શ્રીગણેશ કર્યા છે. આ યાદીમાં પક્ષે અનુભવી નેતાઓ અને યુવા ચહેરાઓ વચ્ચે સચોટ સંતુલન જાળવવાનો પ્રયાસ કર્યો છે, જેથી સત્તા જાળવી રાખવામાં સરળતા રહે.
સુરેન્દ્રનગર ઉપરાંત અરવલ્લી જિલ્લામાં પણ ચૂંટણી પ્રક્રિયા તેજ બની છે. ભાજપે અહીં જિલ્લા પંચાયત, વિવિધ નગરપાલિકાઓ અને તાલુકા પંચાયત માટેના ઉમેદવારોના નામ પણ જાહેર કરી દીધા છે.
ઉમેદવારોના નામ જાહેર થતાની સાથે જ કાર્યકરોમાં ભારે ઉત્સાહ જોવા મળી રહ્યો છે. ભાજપના મોવડી મંડળે આ વખતે જીતવાની ક્ષમતા અને સ્થાનિક જ્ઞાતિ-જાતિના સમીકરણોને ખાસ ધ્યાનમાં રાખીને પસંદગી કરી છે. આગામી 2 થી 3 દિવસમાં બાકી રહેલી પાલિકાઓની યાદી પણ તબક્કાવાર જાહેર કરવામાં આવશે.
