લખતર તાલુકાના તલસાણા ગામેથી ગત 27 જાન્યુઆરી 2026 ના રોજ એક 19 વર્ષીય મૂક-બધિર યુવતી ભેદી સંજોગોમાં ગુમ થઈ હતી. આ મામલે પરિવારે લખતર પોલીસ મથકે જાણવાજોગ ફરિયાદ નોંધાવતા પોલીસે ટેકનિકલ સોર્સ અને સોશિયલ મીડિયાના માધ્યમથી સઘન તપાસ શરૂ કરી હતી. તપાસ દરમિયાન મૂક-બધિર શાળાઓ અને સંસ્થાઓનો પણ સંપર્ક કરવામાં આવ્યો હતો.
પોલીસની તપાસમાં જાણવા મળ્યું કે, યુવતીએ ચોટીલા તાલુકાના ચિરોડા (ઠાંગા) ગામના શૈલેષ રૂડાભાઈ ઓતરાદી સાથે લગ્ન કરી લીધા છે. નોંધનીય છે કે, શૈલેષ અને યુવતી અગાઉ ડી.એસ. પારેખ મૂંગા-બહેરા શાળામાં સાથે અભ્યાસ કરતા હતા. લખતર પોલીસે યુવતીને તેના પતિ સાથે શોધી કાઢી હતી અને કાયદેસરની કાર્યવાહી પૂર્ણ કરી દીકરીનું તેના પરિવાર સાથે સુખદ મિલન કરાવ્યું હતું.
