સુરેન્દ્રનગર જિલ્લાના લીંબડી ડિવિઝન (Limbdi Division) હેઠળ આવતા પાંચ પોલીસ સ્ટેશન વિસ્તારમાંથી પકડાયેલા વિદેશી દારૂના વિશાળ જથ્થાનો આજે નાશ કરવામાં આવ્યો હતો. સાયલાની મોડલ સ્કૂલ પાછળ આવેલા સરકારી ખરાબામાં તંત્ર દ્વારા આ પ્રક્રિયા હાથ ધરવામાં આવી હતી, જેમાં કુલ 5,10,96,830 રૂપિયા ની કિંમતના દારૂ પર જેસીબી (JCB) ફેરવી દેવામાં આવ્યું હતું.
આ કામગીરીમાં સાયલા, લીંબડી, ધજાળા, ચુડા અને પાણસીણા પોલીસ મથક દ્વારા જપ્ત કરાયેલી કુલ 87,247 નંગ નાની-મોટી ઈંગ્લિશ દારૂ અને બીયરની બોટલોનો સમાવેશ થાય છે. દારૂના આ જથ્થાના નાશ (Liquor Destruction) કરવાની પ્રક્રિયા દરમિયાન લીંબડી ડેપ્યુટી કલેક્ટર, ડીવાયએસપી (DySP), નશાબંધી અધિકારી તેમજ તમામ મામલતદાર અને પોલીસ અધિકારીઓનો કાફલો હાજર રહ્યો હતો.
પોલીસ સૂત્રોના જણાવ્યા અનુસાર, સૌથી વધુ દારૂનો જથ્થો સાયલા અને લીંબડી પોલીસ મથકનો હતો. કાયદાકીય પ્રક્રિયાના ભાગરૂપે મેજિસ્ટ્રેટ અને ઉચ્ચ અધિકારીઓની દેખરેખ હેઠળ આ સમગ્ર વિદેશી દારૂ (Foreign Liquor) ના જથ્થાને જમીનદોસ્ત કરી તેનો સંપૂર્ણ નાશ કરવામાં આવ્યો હતો.
