સુરેન્દ્રનગર-વઢવાણ મહાનગરપાલિકા (Surendranagar-Wadhwan Municipal Corporation) વિસ્તારમાં પીવાના પાણીની પાઇપલાઇનમાં ભંગાણ અને ત્યારબાદ તંત્રની ઘોર લાપરવાહીની ઘટનાઓ સતત વધી રહી છે.
વઢવાણના વોર્ડ નંબર 12 (Ward Number 12) વિસ્તારમાં આવેલી દરબારી પ્લોટ શેરીની સામે, મુખ્ય માર્ગ પર છેલ્લા 1 મહિનાથી પીવાના પાણીની પાઇપલાઇનના સમારકામ માટે ખોદકામ કરવામાં આવ્યું હતું.
આશ્ચર્યની વાત એ છે કે, કામગીરી પૂરી થયા બાદ પણ આ જોખમી ખાડાઓ વ્યવસ્થિત રીતે પૂરવામાં આવ્યા નથી. આ બેદરકારીના કારણે વ્યસ્ત ગણાતો આ મુખ્ય રસ્તો હવે જીવલેણ અકસ્માતનો સ્પોર્ટ એટલે કે એક્સિડન્ટ ઝોન (Accident Zone) બની ગયો છે.
ખાડાઓ બન્યા આફત, વાહનચાલકોના જીવ જોખમમાં
સ્થાનિક રહીશોના જણાવ્યા અનુસાર, મનપાના કોન્ટ્રાક્ટર (Contractor) દ્વારા રસ્તા પર આડેધડ ખોદકામ તો કરી નાખવામાં આવ્યું, પરંતુ તેનું યોગ્ય પુરાણ કરવામાં આવ્યું નથી. મેઇન રોડ (Main Road) હોવાના કારણે અહીંથી 24 કલાક નાના-મોટા વાહનોની ભારે અવરજવર રહે છે, જેમાં ખાડાઓને લીધે રોજબરોજ વાહનચાલકો સ્લિપ થઈ રહ્યા છે. ખાસ કરીને રાત્રિના સમયે અંધારામાં આ ખાડાઓ વાહનચાલકો માટે ભારે આફત સમાન સાબિત થઈ રહ્યા છે. પાલિકાની આ ઢીલી નીતિ અને બેદરકારીને કારણે સ્થાનિક લોકોમાં તંત્ર સામે ભારે રોષ જોવા મળી રહ્યો છે.
ખોદકામથી પીવાના પાણીનું સંકટ ઘેરાયું
મુખ્ય માર્ગ પર અકસ્માતનો ભય તો છે જ, પરંતુ તેની સાથે પાઇપલાઇનના અંદરના ભાગે આડેધડ ખોદકામ કરી નાખવામાં આવ્યું હોવાથી આખા વિસ્તારની જળ વિતરણ વ્યવસ્થા (Water Supply System) ખોરવાઈ ગઈ છે. વોર્ડ નંબર 12ના દરબારી પ્લોટ વિસ્તારના લોકોને છેલ્લા ઘણા સમયથી પીવાનું પાણી પૂરતા પ્રમાણમાં અને નિયમિત રીતે મળી રહ્યું નથી. આમ, એક તરફ અકસ્માતનો ડર અને બીજી તરફ પાણીની તંગીના કારણે સ્થાનિકો બેવડી મુશ્કેલીનો સામનો કરી રહ્યા છે.
ત્વરિત કામગીરી કરવા જનતાની પ્રબળ માંગ
સ્થાનિક આગેવાનો અને રહીશોએ મહાનગરપાલિકાના સત્તાધીશો સમક્ષ ઉગ્ર માંગ કરી છે કે, આ વિસ્તારમાં પીવાના પાણીની પાઇપલાઇનનું રિપેરિંગ ઓપરેશન (Operation) યુદ્ધના ધોરણે પૂર્ણ કરવામાં આવે. રસ્તા પરના જોખમી ખાડાઓનું યોગ્ય મટીરિયલ સાથે તાત્કાલિક પુરાણ કરવામાં આવે, જેથી અકસ્માતો અટકે અને લોકોને નિયમિત શુદ્ધ પીવાનું પાણી મળી રહે. જો તંત્ર દ્વારા વહેલી તકે યોગ્ય પગલાં લેવામાં નહીં આવે તો સ્થાનિકોએ આગામી દિવસોમાં ઉગ્ર આંદોલન કરવાની ચીમકી પણ ઉચ્ચારવામાં આવી છે.
