વઢવાણ GIDCની રિમટેક્સ એન્જિનિયરિંગમાં શોર્ટ સર્કિટથી આગ: મશીનરી બળીને ખાખ

Wadhwan GIDC Fire | સુરેન્દ્રનગર (Surendranagar) જિલ્લામાં ઉનાળાની સિઝન દરમિયાન આગ લાગવાની ઘટનાઓ (Fire Incidents) માં ચિંતાજનક વધારો થઈ રહ્યો છે. વઢવાણ જીઆઇડીસી (Wadhwan GIDC) વિસ્તારમાં આવેલી જાણીતી રિમટેક્સ એન્જિનિયરિંગ (Rimtex Engineering Pvt Ltd) માં અચાનક ભયાનક આગ ફાટી નીકળતાં સમગ્ર વિસ્તારમાં અફરાતફરી મચી ગઈ હતી.

પ્રાથમિક માહિતી મુજબ, કંપનીની અંદર રહેલા ઈલેક્ટ્રીક ઉપકરણોમાં અચાનક શોર્ટ સર્કિટ (Short Circuit) થવાના કારણે આ દુર્ઘટના સર્જાઈ હતી. જોતજોતામાં આગે વિકરાળ સ્વરૂપ ધારણ કરી લીધું હતું, જેના લીધે કંપનીમાં રાખેલી કિંમતી મશીનરી અને પ્લાસ્ટિક મટીરીયલ્સ (Plastic Materials) બળીને ખાખ થઈ ગયા હતા.

આગ લાગી ત્યારે પ્લાન્ટમાં અનેક શ્રમિકો કામ કરી રહ્યા હતા. જો કે, ઘટનાની ગંભીરતા સમજીને આજુબાજુના સ્થાનિક લોકો અને અન્ય કંપનીના કર્મચારીઓએ તાત્કાલિક દોડી આવી અંદર ફસાયેલા તમામ કામદારો (Workers) નું સુરક્ષિત રીતે રેસ્ક્યુ (Rescue) કર્યું હતું. તમામ કર્મચારીઓને સમયસર બહાર કાઢી લેવાતા મોટી જાનહાનિ ટળી હતી.

ત્યારબાદ સુરેન્દ્રનગર મહાનગરપાલિકા ( Surendranagar Municipal Corporation)ના ફાયર વિભાગ (Fire Department) ને જાણ કરાતાં 3 જેટલી ફાયર બ્રિગેડની ટીમો (Fire Brigade Teams) તાત્કાલિક ઘટનાસ્થળે પહોંચી ગઈ હતી. ફાયર ફાઈટરોએ સતત પાણીનો મારો ચલાવીને ભારે જહેમત બાદ આગ પર સંપૂર્ણ કાબુ મેળવ્યો હતો.

આગ એટલી ભયાનક હતી કે આજુબાજુની અન્ય ફેક્ટરીઓના માલિકો પણ ચિંતામાં મુકાયા હતા, પરંતુ ફાયર ટીમે આગને આગળ વધતી અટકાવતા સૌ કોઈએ રાહતનો શ્વાસ લીધો હતો. હાલમાં આ અકસ્માતમાં થયેલા આર્થિક નુકસાનની વિગતો મેળવવા સ્થાનિક તંત્ર દ્વારા આગળની તજવીજ હાથ ધરવામાં આવી છે.