સુરેન્દ્રનગર સબજેલમાં હત્યા કેસના કેદીનું શંકાસ્પદ મોત, પરિવારનો હત્યાનો આક્ષેપ

Surendranagar Sub Jail Custodial Death | સુરેન્દ્રનગરની સબજેલમાં સજા કાપી રહેલા એક કેદીનું શંકાસ્પદ સંજોગોમાં મોત નિપજતાં ભારે ચકચાર મચી ગઈ છે.

વર્ષ 2025 માં ચોટીલા ખાતે થયેલી હત્યાના ગુનામાં જેલવાસ ભોગવી રહેલા સુરેશ સાકરીયા નામના આરોપીનું જેલની કસ્ટડી દરમિયાન મોત થયું છે. બનાવની જાણ થતાં જ મૃતકના પરિવારજનોમાં શોકનું મોજું ફરી વળ્યું હતું.

મળતી માહિતી મુજબ, મૃતક કેદી સુરેશ સાકરીયાને થોડા દિવસોથી તાવ અને બીમારી હોવાના કારણે સારવાર અર્થે હોસ્પિટલમાં દાખલ કરવામાં આવ્યો હતો. હોસ્પિટલમાંથી રજા આપ્યા બાદ તેને ફરીથી સબજેલ ખાતે લઈ જવામાં આવ્યો હતો, જ્યાં વહેલી સવારે તેનું અચાનક મોત નીપજ્યું હતું.

આ ઘટનાને પગલે પરિવારજનોએ કેદીની હત્યા કરવામાં આવી હોવાના ગંભીર આક્ષેપો કર્યા છે, જેના કારણે જેલ પરિસરમાં અને હોસ્પિટલ ખાતે તંગદિલીભર્યો માહોલ સર્જાયો હતો.

પરિસ્થિતિની ગંભીરતાને ધ્યાને રાખી વઢવાણના ડેપ્યુટી કલેક્ટર મેહુલ ભરવાડ, સીટી પોલીસ મથકના PI અને PSI સહિતનો પોલીસ કાફલો તાત્કાલિક સિવિલ હોસ્પિટલ ખાતે દોડી આવ્યો હતો.

વહીવટી તંત્ર અને પોલીસે પંચોની હાજરીમાં કાયદેસરની કાર્યવાહી હાથ ધરીને મામલો શાંત પાડવાનો પ્રયાસ કર્યો હતો. જેલ સ્ટાફના જણાવ્યા અનુસાર કેદીનું મોત ટૂંકી બીમારીના કારણે થયું છે.

હાલમાં કેદીના શંકાસ્પદ મોતનું સાચું કારણ જાણી શકાયું નથી. તેથી મૃતદેહને પેનલ પોસ્ટમોર્ટમ (PM) માટે રાજકોટ સિવિલ હોસ્પિટલ ખાતે ખસેડવામાં આવ્યો છે.

ડેપ્યુટી કલેક્ટર મેહુલ ભરવાડના જણાવ્યા મુજબ, રાજકોટ ખાતે પેનલ PMનો રિપોર્ટ આવ્યા બાદ જ મોતનું સાચું કારણ સ્પષ્ટ થશે. હાલમાં સીટી પોલીસ અને જેલ સ્ટાફ દ્વારા આ સમગ્ર કસ્ટડીયલ ડેથની ઘટના અંગે ઊંડાણપૂર્વક તપાસ હાથ ધરવામાં આવી રહી છે.