સુરેન્દ્રનગરમાં ઉનાળાના પ્રારંભે જ લીંબુના ભાવ રૂ.200 પ્રતિ કિલોએ પહોંચ્યા

સુરેન્દ્રનગર જિલ્લામાં ગરમીનો પારો વધતાની સાથે જ લીંબુના ભાવમાં વર્ષનો સૌથી મોટો ઉછાળો જોવા મળ્યો છે. દસ દિવસ પહેલા રૂ.૭0 પ્રતિ કિલોએ મળતા લીંબુનો ભાવ પ્રથમ વખત પ્રતિ કિલો રૂ.200 સુધી પહોંચી ગયો છે, એટલે કે એક મણ લીંબુના ભાવ રૂ.4,000એ પહોંચ્યા છે.

હાલમાં આકરો તડકો અને હીટવેવની સ્થિતિ વચ્ચે આરોગ્ય વિભાગ દ્વારા લીંબુ શરબત અને પ્રવાહી લેવાની અપીલ કરવામાં આવે છે, પરંતુ આસમાને પહોંચેલા ભાવને કારણે સામાન્ય માણસ માટે લીંબુ ખરીદવા હવે મોંઘા સાબિત થઈ રહ્યા છે.

સ્થાનિક સ્તરે લીંબુની આવક નહિવત હોવાથી માર્કેટિંગ યાર્ડમાં બહારથી લીંબુ મંગાવવા પડી રહ્યા છે, જે ભાવવધારાનું મુખ્ય કારણ માનવામાં આવે છે. એક તરફ ઘરેલુ ગેસના વધતા ભાવ અને બીજી તરફ ખાણીપીણીની ચીજવસ્તુઓમાં મોંઘવારીનો માર સહન કરી રહેલા શહેરીજનો માટે લીંબુ જેવી પ્રાથમિક જરૂરિયાત પણ હવે લક્ઝરી બની ગઈ છે. ખાસ કરીને રમઝાન માસ દરમિયાન લીંબુની વધુ જરૂરિયાત રહેતી હોય છે, ત્યારે મોંઘા ભાવે ખરીદી કરવા સિવાય લોકો પાસે બીજો કોઈ વિકલ્પ બચ્યો નથી.