Surendranagar Chain Snatching | સમગ્ર ગુજરાત રાજ્યમાં ચેન સ્નેચિંગની (Chain Snatching) ઘટનાઓમાં સતત વધારો થઈ રહ્યો છે, ત્યારે સુરેન્દ્રનગર પોલીસ સક્રિય મોડમાં આવી છે.
ખેડાના મહેમદાવાદ ખાતેથી એક મહિલાના ગળામાંથી સોનાના ચેનની ચીલઝડપ કરી એક શખ્સ સુરેન્દ્રનગર તરફ આવ્યો હોવાની ચોક્કસ બાતમી લોકલ ક્રાઈમ બ્રાન્ચ (Local Crime Branch – LCB) ની ટીમને મળી હતી.
બાતમીના આધારે સુરેન્દ્રનગર સીટી પોલીસ વિસ્તારમાં પેટ્રોલિંગ સઘન બનાવવામાં આવ્યું હતું. વોચ દરમિયાન શંકાસ્પદ હાલતમાં જણાતા જીતુભાઈ પ્રકાશભાઈ દેવીપૂજક નામના યુવકને ઝડપી પાડવામાં આવ્યો હતો.
પોલીસ દ્વારા તેની અંગઝડતી લેવામાં આવતા તેની પાસેથી ચોરીનો સોનાનો ચેન મળી આવ્યો હતો, જેને LCB ટીમ દ્વારા જપ્ત કરવામાં આવ્યો છે.
ચોટીલા સહિત 6 ગુનાના ભેદ ઉકેલાયા
પોલીસની પ્રાથમિક પૂછપરછમાં અને ઊંડાણપૂર્વકની તપાસમાં (Investigation) ચોંકાવનારો ખુલાસો થયો છે. ઝડપાયેલા આરોપીએ સુરેન્દ્રનગરના ચોટીલા (Chotila) ખાતે પણ આ જ પ્રકારે મહિલાના ગળામાંથી ચેન ખેંચ્યો હોવાની કબૂલાત કરી હતી. આ સિવાય તેણે ગુજરાત રાજ્યના અલગ-અલગ 6 જેટલા સ્થળો પર ચેન સ્નેચિંગની ઘટનાઓને અંજામ આપ્યો હોવાનું તપાસમાં ખુલ્યું છે.
LCB એ 1.92 લાખનો મુદ્દામાલ રિકવર કર્યો
સુરેન્દ્રનગર LCB ટીમે રીઢા ગુનેગારની ધરપકડ (Arrest) કરી તેની પાસેથી કુલ ₹1.92 લાખનો મુદ્દામાલ રિકવર (Recover) કર્યો છે અને કાયદેસરની કાર્યવાહી હાથ ધરીને વધુ તપાસ શરૂ કરી છે.
