સુરેન્દ્રનગર શહેરમાં વિદેશી દારૂના વેચાણ અંગે સ્થાનિકોની સતત ફરિયાદો બાદ પોલીસ એક્શન મોડમાં આવી છે. સુરેન્દ્રનગર સીટી એ ડિવિઝન પોલીસે બાતમીના આધારે કૃષ્ણનગર વિસ્તારની છેલ્લી શેરી સામે આવેલા સરકારી ખરાબાની જગ્યામાં દરોડો પાડ્યો હતો.
બુટલેગરોએ પોલીસથી બચવા માટે જમીનમાં મોટો ખાડો ખોદીને ઇંગ્લિશ દારૂનો જથ્થો છુપાવ્યો હતો. પોલીસે જમીનમાંથી વિદેશી દારૂની નાની-મોટી કુલ 422 બોટલો બહાર કાઢીને જપ્ત કરી છે.
આ સાથે જ દારૂની હેરાફેરી માટે ઉપયોગમાં લેવાતા 2 સ્કૂટર અને 2 મોબાઈલ ફોન સહિત કુલ 2.47 લાખ રૂપિયાનો મુદ્દામાલ જપ્ત કરાયો છે. તપાસમાં આ દારૂનો જથ્થો વિશુભા સુરપાલસિંહ રાણાનો હોવાનું ખુલ્યું છે. પોલીસે આ મામલે મયુરભાઈ પ્રતાપભાઈ ખાચર અને એક કાયદાના સંઘર્ષમાં આવેલા કિશોરની અટકાયત કરી આગળની તપાસ હાથ ધરી છે.
