સુરેન્દ્રનગર અને વઢવાણ સહિતના શહેરી વિસ્તારોમાં ઈંગ્લીશ તેમજ દેશી દારૂની હેરાફેરીના બનાવો સતત વધી રહ્યા છે. આ અસામાજીક પ્રવૃતિઓને રોકવા માટે જોરાવરનગર પોલીસની ટીમ પેટ્રોલિંગમાં હતી.
આ દરમિયાન ખેરાળી ચોકડી પાસેથી એક શંકાસ્પદ પિકઅપ વાહન પસાર થતા પોલીસે તેને રોકીને તલાશી લીધી હતી. વાહનની તપાસ કરતા તેમાંથી 315 લીટર દેશી દારૂ મળી આવ્યો હતો. પોલીસે ઘટનાસ્થળેથી દારૂ, પિકઅપ વાહન અને મોબાઈલ ફોન સહિત કુલ Rs 2.68 લાખનો મુદ્દામાલ કબજે કર્યો છે.
પોલીસે પિકઅપ ચાલકની કડક પૂછપરછ કરતા તેણે પોતાનું નામ દિનેશ અરજણભાઈ બાવળિયા (રહે. ગઢડા, બોટાદ) હોવાનું જણાવ્યું હતું. આરોપીની વધુ પૂછપરછમાં સામે આવ્યું કે, સાયલા તાલુકાના જયદીપ માણસીભાઈ ખવડ અને કુલદીપ કાઠી નામના બે શખ્સોએ આ દેશી દારૂ ભરી આપ્યો હતો.
આ ઉપરાંત, આ દારૂનો જથ્થો રતનપરના સુધારા પ્લોટમાં રહેતી અમીનાબેન સુલેમાનભાઈ માણેક નામની મહિલાએ મંગાવ્યો હોવાની પણ કબૂલાત થઈ છે. જોરાવરનગર પોલીસે આ મામલે ઝડપાયેલા ચાલક સહિત કુલ 4 શખ્સો સામે પ્રોહીબિશન એક્ટ હેઠળ ગુનો નોંધી આગળની કાયદેસરની કાર્યવાહી હાથ ધરી છે.
