સુરેન્દ્રનગરમાં કેન્સર જેવી ગંભીર બીમારી સામે લડતી મહિલાઓના આત્મવિશ્વાસમાં વધારો કરવા માટે એક અનોખું અભિયાન ચાલી રહ્યું છે. સારવાર દરમિયાન કીમોથેરાપી જેવી પ્રક્રિયાઓને કારણે મહિલાઓ પોતાના વાળ ગુમાવતી હોય છે, જે તેમના માનસિક સ્વાસ્થ્ય પર અસર કરે છે. આવી બહેનોની વહારે સુરેન્દ્રનગરની સંસ્થાઓ આવી છે અને છેલ્લા 4 વર્ષથી “Donate Hair Donate Hope” પ્રોજેક્ટ સફળતાપૂર્વક ચલાવવામાં આવી રહ્યો છે.
આ ઉમદા અભિયાન ‘પરિવર્તન ડેવલપમેન્ટ રૂરલ ટ્રસ્ટ’ અને ‘લાયન્સ ક્લબ ઓફ સુરેન્દ્રનગર ક્રાઉન’ ના સંયુક્ત ઉપક્રમે ચલાવવામાં આવે છે. તાજેતરમાં આ પ્રોજેક્ટમાં એક હૃદયસ્પર્શી કિસ્સો સામે આવ્યો છે, જેમાં સમીરભાઈ પંજવાનીની નાનકડી દીકરી મિન્સા પંજવાનીએ અત્યંત ઉત્સાહ અને હસતા મુખે પોતાના વાળનું દાન કર્યું છે. આ માસૂમ બાળકીના પ્રેરણાદાયી યોગદાનથી સમાજમાં હેર ડોનેશન પ્રત્યે જાગૃતિ વધી છે.
આ પ્રોજેક્ટના ડિસ્ટ્રિક્ટ ચેરપર્સન લાયન જિજ્ઞાસા નાયક અને લાયન કાશ્મીરા ગોવાણીના માર્ગદર્શન હેઠળ એકત્ર થયેલા વાળમાંથી વિગ (Wig) બનાવી કેન્સર પીડિત મહિલાઓને નિઃશુલ્ક આપવામાં આવે છે. આ સેવાકીય પ્રવૃત્તિથી પીડિત મહિલાઓને નવી ઓળખ અને સમાજમાં આત્મવિશ્વાસ સાથે જીવવાની પ્રેરણા મળી રહી છે. નાની વયે મિન્સાએ બતાવેલી આ સંવેદના અન્ય લોકો માટે પણ ઉદાહરણરૂપ બની છે.
