સુરેન્દ્રનગર જિલ્લા પોલીસ વડાની સૂચનાથી નાસતા-ફરતા આરોપીઓને ઝડપી પાડવા માટે ચાલી રહેલી ખાસ ડ્રાઈવ અંતર્ગત પેરોલ ફર્લો સ્ક્વોડને મોટી સફળતા મળી છે.
સુરેન્દ્રનગર સિટી પોલીસ સ્ટેશનમાં નોંધાયેલા વિશ્વાસઘાત અને છેતરપિંડીના ગુનામાં છેલ્લા 23 વર્ષથી પોલીસને થાપ આપી રહેલા બે લિસ્ટેડ આરોપીઓને મહારાષ્ટ્રથી દબોચી લેવામાં આવ્યા છે.
આરોપી જીગ્નેશભાઈ સુરેશભાઈ સંઘવી અને સુરેશભાઈ ડાયાલાલ સંઘવી વર્ષોથી પોતાની ઓળખ છુપાવીને મહારાષ્ટ્રમાં રહેતા હતા. ટેકનિકલ સર્વેલન્સ અને બાતમીના આધારે સુરેન્દ્રનગર પોલીસની ટીમ મહારાષ્ટ્ર પહોંચી હતી, જ્યાં આંબેગાવ પઠાર વિસ્તારમાં આવેલા એક એપાર્ટમેન્ટમાંથી બંનેની ધરપકડ કરવામાં આવી હતી.
23 વર્ષ જૂના આ કેસમાં પિતા-પુત્રની જોડી ઝડપાઈ જતાં કાયદેસરની કાર્યવાહી હાથ ધરી તેમને જેલ હવાલે કરવામાં આવ્યા છે.
