ધ્રાંગધ્રા પાસે હકાભા ગઢવીની કાર નદીમાં ખાબકી, સ્થાનિકોએ કાચ તોડી જીવ બચાવ્યો

ધ્રાંગધ્રાના બાઈસાબગઢ પાસે હાસ્ય કલાકાર હકાભા ગઢવીની કાર નદીમાં ખાબકી, સ્થાનિકોએ કાચ તોડી જીવ બચાવ્યો

સુરેન્દ્રનગર જિલ્લાના ધ્રાંગધ્રા તાલુકાના બાઈસાબગઢ ગામ નજીક જાણીતા લોકસાહિત્યકાર અને હાસ્ય કલાકાર હકાભા ગઢવી (Hakabha Gadhvi)ની કાર અકસ્માતગ્રસ્ત થઈ હતી. હકાભા ગઢવી હિંગળાજ માતાજીના મંદિરે દર્શન કરીને પરત ફરી રહ્યા હતા ત્યારે બાઈસાબગઢ અને પીપળા ગામ વચ્ચે વરસાદી પાણી ભરાયેલા રસ્તા પરથી પસાર થતાં ડ્રાઈવરે સ્ટેયરિંગ પરથી કાબુ ગુમાવ્યો હતો. પરિણામે કાર નદીની પાળી તોડીને સીધી પાણીમાં ખાબકી હતી.

ઘટના બનતા જ કારમાં ઝડપથી પાણી ભરાવા લાગ્યું હતું અને દરવાજા લોક થઈ ગયા હતા. જોકે, ઘટનાની જાણ થતાં જ આસપાસના સ્થાનિક યુવકો અને તેમના મિત્રો તાત્કાલિક સ્થળ પર દોડી આવ્યા હતા.

યુવકોએ ભારે સમયસૂચકતા વાપરીને ગાડીના કાચ તોડી હકાભા ગઢવી (Hakabha Gadhvi) અને તેમના ડ્રાઈવરને બારીમાંથી સુરક્ષિત રીતે બહાર કાઢ્યા હતા. નદીના પ્રવાહમાંથી તેમને સહીસલામત કિનારે લાવવામાં આવ્યા હતા.

આ અકસ્માતમાં હકાભા ગઢવી (Hakabha Gadhvi)ને પગના ભાગે સામાન્ય ઈજાઓ પહોંચતાં તેમને નજીકની હોસ્પિટલમાં સારવાર અર્થે ખસેડાયા હતા. ઘટના બાદ ચાહકોમાં ચિંતાનું મોજું ફરી વળ્યું હતું. પરંતુ ટેલિફોનિક વાતચીતમાં હકાભા ગઢવી (Hakabha Gadhvi)એ પોતે સંપૂર્ણપણે સ્વસ્થ હોવાનું જણાવી સ્થાનિક લોકોનો આભાર માન્યો હતો. સમયસર થયેલી બચાવ કામગીરીને કારણે મોટી દુર્ઘટના ટળી હતી અને સૌએ રાહતનો શ્વાસ લીધો હતો.