સાણંદ પાસે ટ્રેલરે કારને ટક્કર મારતા વઢવાણના શિક્ષકનું મોત

Car Accident | વઢવાણના ગણપતી ફાટસર પાસે આવેલી મહાવીરનગર સોસાયટીમાં રહેતા અને થાન પાસેની કાનપર પ્રાથમિક શાળામાં શિક્ષક તરીકે ફરજ બજાવતા લાલજીભાઇ ઉકાભાઇ પરમાર (ઉ.વ.50)ને ગઇકાલે રવિવારે રજા હોવાથી બપોરના સુમારે તેમની બલેનો કાર (જીજે-13-સીએફ-6120) લઇને કામ અર્થે અમદાવાદ આવ્યા હતા. કામ પુરુ થયા બાદ રાત્રે બોપલથી માધવનગર બાયપાસ વાળા રોડે થઇને સુરેન્દ્રનગર જવા નીકળ્યા હતા.

પોણા આઠ વાગ્યાના સુમારે નિધરાડ નજીક આવેલા મુનિઆશ્રમ ચોકડી પાસે પહોચ્યા હતા. આ સમયે સામેથી આવતા આવતા ટ્રેલર (જીજે-39-ટીએ-4024)સાથે કાર અથડાતા લાલજીભાઇને તેમને હાથ, પગ સહિત શરીરે ગંભીર ઇજા પહોંચી હતી. બીજી તરફ અકસ્માત સર્જીને ચાલક ટ્રેલર મુકીને ફરાર થઇ ગયો હતો.

ઘટના સ્થળે પહોંચેલી ૧૦૮ની ટીમે લાલજીભાઇના મોબાઇલ નંબરથી તેમના પુત્ર દર્શનને આ અકસ્માતની જાણ કરીને લાલજીભાઇને સારવાર માટે સાણંદ સી.એચ.સીમાં લઇ જવાયા હતા.

આ ઘટના અંગે દર્શને તુરંત સાણંદમાં રહેતા તેના કૌટુંબિક મામા ગણેશભાઇ ડોડિયાને જાણ કરીને સાણંદ સી.એસ.પી પહોંચવાનું જણાવીને તેઓ પરિવાર સાથે સાણંદ પહોંચ્યા હતા. સાણંદ પહોંચેલા લાલજીભાઇના સગાસબંધીઓએ તેમને વધુ સારવાર માટે સાણંદની ખાનગી હોસ્પિટલમાં ખસેડયા હતા.

પરંતું લાલજીભાઇની સ્થિતિ ગંભીર જણાતા તેમને ત્યાંથી અમદાવાદની મેલેંગો સિમ્સ હોસ્પિટલમાં લઇ જવાયા હતા જ્યાં મોડી રાત્રે ૧.૪૭ કલાકે સારવાર દરમિયાન તેમનું સારવાર દરમિયાન મોત નીપજ્યું હતું. સાણંદ પોલીસે ટ્રેલરના ચાલક સામે અકસ્માતનો ગુનો નોંધીને તેને ઝડપી લેવાના ચક્રો ગતિમાન કર્યા છે.