મહેસાણાના દેદિયાસણ પાસે એક્ટિવા સ્લીપ થતા પાટડીના યુવાનનું મોત

સુરેન્દ્રનગર જિલ્લાના પાટડીના એક આશાસ્પદ યુવાનનું મહેસાણાના દેદિયાસણ ગામ નજીક સર્જાયેલા અકસ્માતમાં કરુણ મૃત્યુ નિપજ્યું છે.

મળતી માહિતી મુજબ, પાટડીથી વિરમગામ જઈ રહેલા રાજેન્દ્રસિંહ પરમારનું એક્ટિવા અચાનક સ્લીપ થઈ જતાં આ દુર્ઘટના ઘટી હતી. આ ઘટના ફુલકી પાસે ડેડીયાસણ ગામ નજીક આવેલા ડાયવર્ઝન પાસે બની હતી, જ્યાં યુવાનને માથાના ભાગે ગંભીર ઈજાઓ પહોંચી હતી.

અકસ્માત સર્જાતા જ આસપાસના લોકો દોડી આવ્યા હતા અને 108 એમ્બ્યુલન્સ મારફતે યુવાનને તાત્કાલિક વિરમગામ હોસ્પિટલ ખસેડવામાં આવ્યો હતો.

જોકે, હોસ્પિટલ પહોંચતા જ ફરજ પરના તબીબે રાજેન્દ્રસિંહ પરમારને મૃત જાહેર કર્યા હતા. હોસ્પિટલ ખાતે જરૂરી પોસ્ટમોર્ટમની વિધિ પૂર્ણ કર્યા બાદ મૃતદેહ પરિવારજનોને સોંપવામાં આવ્યો હતો. પાટડી ખાતે યોજાયેલી અંતિમ યાત્રામાં મોટી સંખ્યામાં ગ્રામજનો જોડાયા હતા અને સમગ્ર પંથકમાં શોકની લાગણી પ્રસરી ગઈ છે.