સુરેન્દ્રનગર-ધંધુકા રૂટની એસ.ટી. બસમાંથી મુસાફરના 11.75 લાખના સોના-ચાંદીના દાગીનાની ચોરી

સુરેન્દ્રનગરથી ધંધુકા તરફ જતી એસ.ટી. બસમાં મુસાફરી કરી રહેલા એક પરિવાર સાથે મોટી ચોરીની ઘટના બની હોવાનું સામે આવ્યું છે.

બસમાં બેઠેલા મુસાફરના સામાન ભરેલી થેલીમાંથી અંદાજે 11.75 લાખ રૂપિયાની કિંમતના સોના-ચાંદીના કિંમતી દાગીના અને રોકડ રકમની ઉઠાંતરી થતા ચકચાર મચી ગઈ છે.

આ મામલે ભીમજભાઈ છગનભાઈ ભટ્ટી નામના શખ્સે લીંબડી પોલીસ સ્ટેશનમાં સત્તાવાર ફરિયાદ નોંધાવી છે.

પ્રાપ્ત માહિતી અનુસાર, ફરિયાદી પોતાના પરિવાર સાથે વિરમગામથી એસ.ટી. બસ દ્વારા વઢવાણ આવ્યા હતા અને ત્યાંથી સુરેન્દ્રનગર-ધંધુકા રૂટની બસમાં સવાર થયા હતા.

મુસાફરી દરમિયાન ભીમજભાઈ પાસે પીળા રંગની પ્લાસ્ટિકની થેલી હતી, જેમાં કપડાં, 20,000 રૂપિયા રોકડા, અંદાજે 11 તોલા સોનાના દાગીના (જેની કિંમત આશરે 8,15,000 રૂપિયા હતી) અને ચાંદીના વિવિધ દાગીના (જેની કિંમત આશરે 3,20,000 રૂપિયા હતી) મળીને કુલ 11,75,000 રૂપિયાનો મુદ્દામાલ ભરેલો હતો.

લીંબડી પાસે બસમાં ભીડ ઓછી થતાં તેઓ સીટ પર બેઠા હતા અને થેલી પગ પાસે રાખી હતી.

જોકે, જ્યારે બસ ધંધુકા પહોંચી ત્યારે તેઓએ થેલી ગાયબ થયેલી જોઈ હતી. આસપાસ ભારે શોધખોળ કરવા છતાં થેલીનો કોઈ પતો લાગ્યો ન હતો.

આ ગંભીર મામલે લીંબડી પોલીસે અજાણ્યા શખ્સો વિરુદ્ધ ગુનો નોંધીને બસ રૂટના સીસીટીવી ફૂટેજ અને અન્ય ટેકનિકલ પુરાવાઓના આધારે આરોપીઓને ઝડપી પાડવા માટે સઘન તપાસ શરૂ કરી છે.