સુરેન્દ્રનગરના લીંબડી તાલુકાના રાસકા ગામે ખેડૂતોના ખેતરમાંથી પસાર થતી વીજ લાઈનના તાર કાપી ચોરી કરવાની ઘટનાનો ભેદ ઉકેલાયો છે. ખેડૂતો જ્યારે વહેલી સવારે વાડીએ ગયા ત્યારે મોટર શરૂ ન થતા તપાસ કરતા જાણવા મળ્યું હતું કે થાંભલા પરથી અંદાજે 480 કિલો એલ્યુમિનિયમના વીજ વાયરની ચોરી થઈ છે.
આ મામલે પીજીવીસીએલ (PGVCL) અને પોલીસમાં ફરિયાદ છતાં સ્થાનિક પોલીસ તપાસમાં નિષ્ફળ રહી હતી, ત્યારે સુરેન્દ્રનગર લોકલ ક્રાઈમ બ્રાન્ચે (LCB) આંતરરાજ્ય ગેંગના મુખ્ય આરોપીને ઝડપી પાડ્યો છે.
એલ.સી.બી.ની તપાસમાં સામે આવ્યું છે કે રાજસ્થાનની 6 શખ્સોની ટોળકી આ પ્રકારની ચોરીમાં માહિર છે. પોલીસે રાજસ્થાનના ડિડવાણાના રહેવાસી કિશનલાલ મોહનલાલ ગુર્જરની અટકાયત કરી તેની પાસેથી ચોરી કરેલો 480 કિલો વીજ વાયર સહિત કુલ 1.46 લાખનો મુદ્દામાલ જપ્ત કર્યો છે. આ ગેંગના અન્ય સાગરીતો કૈલાસસિંહ, પ્રહલાદભાઈ, શ્રવણસિંહ અને રાજુ સહિતના આરોપીઓને પકડવા પોલીસે ચક્રો ગતિમાન કર્યા છે
