લીંબડી પરશુરામ ધામ પાસે રિક્ષા વીજપોલ સાથે અથડાતા અકસ્માત, બેને ઇજા

રાજકોટ-અમદાવાદ હાઈવે પર લીંબડી પાસે વહેલી સવારે એક ગમખ્વાર અકસ્માત સર્જાયો હતો. અમદાવાદના રહેવાસી 22 વર્ષીય ફૈઝલખાન કાઝી અને 50 વર્ષીય પપ્પુખાન પઠાણ રિક્ષામાં રાજકોટથી પરત ફરી રહ્યા હતા, ત્યારે લીંબડી નજીક પરશુરામ ધામ પાસે રિક્ષા ચાલકને જોકું આવી ગયું હતું.

આના પરિણામે રિક્ષા બેકાબૂ બનીને રોડ સાઈડના વીજપોલ સાથે ધડાકાભેર અથડાઈ હતી. આ અકસ્માતમાં બંને મુસાફરોને શરીરે ગંભીર ઈજાઓ પહોંચી હતી. ઘટનાની જાણ થતા જ 108 એમ્બ્યુલન્સના કર્મચારીઓ પ્રતિકભાઈ રામી અને જગદીશભાઈ સાકરીયા તાત્કાલિક સ્થળ પર પહોંચ્યા હતા અને ઈજાગ્રસ્તોને પ્રાથમિક સારવાર આપી લીંબડી સરકારી હોસ્પિટલ ખસેડ્યા હતા.

આ અકસ્માત દરમિયાન 108 ની ટીમે ઉમદા માનવતા અને પ્રામાણિકતાનું ઉદાહરણ પૂરું પાડ્યું હતું. રિક્ષામાંથી મળી આવેલ 27,720 રૂપિયાની રોકડ રકમ, 2 મોબાઈલ ફોન, ઘડિયાળ અને અન્ય મહત્વના દસ્તાવેજો સુરક્ષિત રીતે હોસ્પિટલના ફરજ પરના ડોક્ટર ઝીયાબહેનને સોંપ્યા હતા. હાલ બંને ઈજાગ્રસ્તોની હાલત ગંભીર હોવાથી તેમને વધુ સારવાર માટે અમદાવાદ રિફર કરવામાં આવ્યા છે.