સુરેન્દ્રનગર લોકલ ક્રાઈમ બ્રાન્ચ (LCB) ની ટીમે ધ્રાંગધ્રા-અમદાવાદ નેશનલ હાઈવે પર સફળતાપૂર્વક દરોડો પાડીને વિદેશી દારૂનો જથ્થો ઝડપી પાડ્યો છે.
માલવણ ટોલનાકા પાસે શંકાસ્પદ હાલતમાં પસાર થઈ રહેલી એક બોલેરો પીકઅપ ગાડીને અટકાવીને તલાશી લેવામાં આવતા, ગાડીની અંદર બનાવવામાં આવેલા ગુપ્ત ચોરખાનામાંથી ઇંગ્લિશ દારૂની કુલ 432 બોટલો મળી આવી હતી.
બૂટલેગરો દ્વારા પોલીસને છેતરવા માટે ગાડીમાં ખાસ પ્રકારનું ખાનું તૈયાર કરવામાં આવ્યું હતું. પરંતુ એલ.સી.બી.ની સતર્કતાએ આ દારૂના જથ્થાનો પર્દાફાશ કર્યો હતો.
આ કાર્યવાહી દરમિયાન પોલીસે 1.10 લાખ રૂપિયાની કિંમતનો દારૂ, બોલેરો પીકઅપ અને મોબાઈલ ફોન મળી કુલ 6.15 લાખ રૂપિયાનો મુદ્દામાલ જપ્ત કર્યો છે. આ કેસમાં પોલીસે રાજસ્થાનના નાવારા ગામના રહેવાસી રાયમલ દેવારામ દેવાસીની અટકાયત કરી છે.
આ ઉપરાંત, અન્ય બે ઇસમો વિરુદ્ધ પણ ગુનો દાખલ કરવામાં આવ્યો છે. હાઈવે પરથી પસાર થતા ગેરકાયદેસર નશાના કારોબાર સામે પોલીસે લાલ આંખ કરતા બૂટલેગરોમાં ફફડાટ ફેલાયો છે.
