ધ્રાંગધ્રા PGVCLની લાલ આંખ: 74 લાખનું બિલ બાકી હોય તેવા 2463 વીજ કનેક્શન કપાશે

ધ્રાંગધ્રામાં પીજીવીસીએલ (PGVCL) વિભાગીય કચેરી દ્વારા વીજ બિલની લાંબા સમયથી બાકી વસૂલાત માટે આકરા પગલાં લેવાની તૈયારી શરૂ કરી દેવામાં આવી છે. આગામી 17 માર્ચના રોજ સમગ્ર ધ્રાંગધ્રા પંથકમાં ‘મેગા ડિસકનેક્શન ડ્રાઇવ’ યોજાશે. તંત્રના જણાવ્યા અનુસાર, કુલ 2463 ગ્રાહકો પાસેથી રૂ. 74.22 લાખની માતબર રકમ વસૂલવાની બાકી છે.

PGVCL દ્વારા સ્પષ્ટ ચેતવણી આપવામાં આવી છે કે જે ગ્રાહકો નિયત સમય મર્યાદામાં પોતાના વીજ બિલની ભરપાઈ નહીં કરે, તેમના વીજ કનેક્શન કોઈપણ પૂર્વ સૂચના વગર તાત્કાલિક કાપી નાખવામાં આવશે. નાયબ કાર્યપાલક ઈજનેરે ગ્રાહકોને અપીલ કરી છે કે અંધારપટ અને કાયદેસરની કાર્યવાહીથી બચવા માટે 17 માર્ચ પહેલાં બાકી રકમ જમા કરાવી દેવી. આ અભિયાનને સફળ બનાવવા માટે વીજ વિભાગે વિવિધ ટીમોનું પણ ગઠન કર્યું છે.