ધ્રાંગધ્રાના તબીબને ડ્રગ્સના કેસમાં ફસાવવાનો કારસો: IB અધિકારી બની તોડ કરનારી ટોળકી સામે ફરિયાદ

ધ્રાંગધ્રામાં ડોકટર હાઉસ હોસ્પિટલ ચલાવતા ડો. આશિષ શાહને ડ્રગ્સના ખોટા કેસમાં ફસાવી તોડ કરવાનો સનસનીખેજ પ્રયાસ સામે આવ્યો છે. 11 માર્ચના રોજ તબીબ પોતાની કારમાં અમદાવાદ જઈ રહ્યા હતા, ત્યારે માલવણ ટોલ ટેક્સ પાસે એક મહિલા અને ત્રણ શખ્સોએ અધિકારી હોવાની ઓળખ આપી તેમની કાર રોકાવી હતી.

 તપાસના બહાને આ ટોળકીએ કારમાંથી સફેદ પાવડરની પોટલી કાઢી તેને ડ્રગ્સ હોવાનું કહી તબીબ પર દબાણ બનાવ્યું હતું. તબીબને શંકા જતાં તેમણે પ્રતિકાર કર્યો હતો, જેથી ટોળકી ત્યાંથી જતી રહી હતી.

ત્યારબાદ કેતનભાઈ હસમુખભાઈ રાવલ નામના શખ્સે પોતે IB (ઇન્ટેલિજન્સ બ્યુરો) માં હોવાનું કહી ફોન પર તબીબને ડ્રગ્સ કેસમાં ફસાવી દેવાની ધમકી આપી ફરિયાદ ન કરવા દબાણ કર્યું હતું. જોકે, તપાસ કરતા આ શખ્સ નકલી હોવાનું બહાર આવ્યું હતું. આ સમગ્ર મામલે તબીબે બજાણા પોલીસ મથકે કેતન રાવલ અને એક અજાણી મહિલા સહિત 5 શખ્સો વિરુદ્ધ ફરિયાદ નોંધાવતા પોલીસે તપાસના ચક્રો ગતિમાન કર્યા છે.