ચોટીલાના ગુંદામાં પવનચક્કીના કેબલ ચોરીનો ભેદ ઉકેલાયો; 500 કિલો કોપર સાથે એક તસ્કર ઝડપાયો

સુરેન્દ્રનગર (Surendranagar) જિલ્લાના ચોટીલા તાલુકાના ગુંદા ગામની સીમમાં આવેલી પવનચક્કીમાં થયેલી મોટી ચોરીનો ભેદ પોલીસે ઉકેલી નાખ્યો છે.

આઈનોક્સ ગ્રીન એનર્જી સર્વિસ લિમિટેડ કંપનીની પવનચક્કીમાંથી અજાણ્યા તસ્કરો (Burglars) અંદાજે 500 કિલો કોપર અને એલ્યુમિનિયમ કેબલોની ચોરી કરી ફરાર થઈ ગયા હતા.

આ મામલે આણંદપુર પોલીસ મથકમાં ફરિયાદ નોંધાતા પોલીસે ટેકનિકલ સોર્સ (Technical Source) અને હ્યુમન ઇન્ટેલિજન્સની મદદથી તપાસ હાથ ધરી હતી.

પોલીસ તપાસમાં સામે આવ્યું કે તાજપર ગામના અજીતભાઈ વિહાભાઈ ગાબુ અને ગુંદા ગામના દિલીપભાઈ છગનભાઈ સોલંકીએ આ ચોરીને અંજામ આપ્યો હતો.

પોલીસે આરોપી અજીત ગાબુની ધરપકડ (Arrest) કરી તેની પૂછપરછ કરતા ચોરીના મુદ્દામાલનું વેચાણ કર્યું હોવાનું કબૂલ્યું હતું. પોલીસે વેચાણ કરેલ સ્થળેથી ₹5 લાખની કિંમતનું 500 કિલો કોપર (Copper) અને ₹32,000 ના એલ્યુમિનિયમ કેબલ મળી કુલ ₹5.32 લાખનો મુદ્દામાલ જપ્ત કર્યો છે.

હાલમાં મુખ્ય આરોપી દિલીપ સોલંકી હજુ ફરાર છે, જેને પકડવા પોલીસે ચક્રો ગતિમાન કર્યા છે.