- 9 ફરિયયાદ અરજી અને 5 ગુનાની તપાસ પેન્ડિંગ રાખતા સુરેન્દ્રનગર પોલીસ વડાનું આકરૂં પગલું
Jorawarnagar Police | સુરેન્દ્રનગર જિલ્લામાં ફરજ પ્રત્યે બેદરકારી અને નિષ્ક્રિયતા દાખવનાર પોલીસ કર્મચારીઓ સામે જિલ્લા પોલીસવડા દ્વારા લાલ આંખ કરવામાં આવી છે.
જોરાવરનગર પોલીસ સ્ટેશનમાં ફરજ બજાવતા મહિલા હેડ કોન્સ્ટેબલ સોનલબેન મોતીભાઈ સુમેરાને જિલ્લા પોલીસવડા પ્રેમસુખ ડેલુ દ્વારા સસ્પેન્ડ કરવાનો આદેશ આપવામાં આવ્યો છે.
મહિલા હેડ કોન્સ્ટેબલ પાસે 9 જેટલી ફરિયાદ અરજીઓ અને 5 ગુનાઓની તપાસ લાંબા સમયથી પેન્ડિંગ હોવા છતાં તેઓ કામગીરીમાં સતત ઢીલી નીતિ અપનાવી રહ્યા હતા.
તાજેતરમાં 19મીના રોજ સુધારા પ્લોટ વિસ્તારમાં આવેલી અરજી પર સમયસર અને તત્કાલ કાર્યવાહી ન કરવાને કારણે ફરીદાબેન અવેશભાઇ મોવરના ઘરે પથ્થરમારો, તોડફોડ, છેડતી અને લૂંટની ગંભીર ઘટના બની હતી. જો અગાઉ જ અરજી પર યોગ્ય પગલાં લેવાયા હોત તો આ બનાવ અટકી શકત.
આ બાબતની ગંભીર નોંધ લઈને જિલ્લા પોલીસવડાએ તેમને ફરજ મોકૂફ (સસ્પેન્ડ) કર્યા છે. પોલીસ વડાની આ કડક કાર્યવાહીથી સમગ્ર પોલીસ બેડામાં ભારે ખળભળાટ મચી જવા પામ્યો છે.
