સુરેન્દ્રનગર જિલ્લામાં અનિયમિત વરસાદ વચ્ચે જો વરસાદ ખેંચાય અથવા લાંબો વિરામ લે, તો ઉભા પાકને રક્ષણ આપવા અને જમીનમાં પૂરતો ભેજ જાળવી રાખવા માટે જિલ્લા ખેતીવાડી વિભાગ દ્વારા વિશેષ કૃષિ સલાહ અને માર્ગદર્શિકા જાહેર કરવામાં આવી છે.
વરસાદના અભાવે ઉત્પાદન પર વિપરીત અસર ન પડે તે માટે ખેડૂતોને વૈજ્ઞાનિક અભિગમ અપનાવી જમીન અને પાકની યોગ્ય સંભાળ લેવા અનુરોધ કરાયો છે.
જમીનમાં ભેજનું સંરક્ષણ કરવા માટે ખેડૂતોએ સમયસર આંતર-ખેડ કરવી તેમજ નીંદણ નિયંત્રણ કરવું ખાસ જરૂરી છે. ખેતરમાંથી નીંદણ દૂર કરવાથી જમીનનો ભેજ અને પોષક તત્વો મુખ્ય પાકને પૂરતા પ્રમાણમાં મળી રહે છે.
આ ઉપરાંત બે ચાસ વચ્ચે સૂકું ઘાસ, સુકાં પાંદડા કે પ્લાસ્ટિકનું મલ્ચિંગ કરવાથી પાણીનું બાષ્પીભવન અટકે છે અને ભેજ લાંબા સમય સુધી જળવાઈ રહે છે.
સિંચાઈના પાણીની મર્યાદિત ઉપલબ્ધતા હોય ત્યારે પરંપરાગત પદ્ધતિને બદલે ટપક (Drip) કે ફુવારા (Sprinkler) જેવી સૂક્ષ્મ પિયત પદ્ધતિઓનો ઉપયોગ કરવો જોઈએ.
ભેજની અછત સામે છોડને સક્ષમ રાખવા 1% થી 2% યુરિયા અથવા પોટેશિયમ નાઇટ્રેટ (13:0:45) ના દ્રાવણનો છંટકાવ કરવાની સલાહ અપાઈ છે.
જો ભેજ ખૂબ ઓછો હોય તો નબળા છોડની પારવણી કરવી અને પાક પરિપક્વ થાય ત્યારે સમયસર કાપણી કરી લેવી. વધુ ટેકનિકલ માર્ગદર્શન માટે ગ્રામસેવક, KVK અથવા કિસાન કોલ સેન્ટરના ટોલ-ફ્રી નંબર 1800 180 1551 પર સંપર્ક કરવા જણાવાયું છે.
