Poshan Utsav Wadhwan | સુરેન્દ્રનગર જિલ્લાના વઢવાણ ઘટક-2 ખાતે મહિલા અને બાળ વિકાસ વિભાગ દ્વારા ‘પોષણ ઉત્સવ’ની ઉત્સાહભેર ઉજવણી કરવામાં આવી હતી.
બાળવિકાસ અને નારી સશક્તિકરણના ઉદ્દેશ સાથે આયોજિત આ કાર્યક્રમમાં THR (ટેક હોમ રાશન) તેમજ વિવિધ મિલેટ્સમાંથી બનતી પૌષ્ટિક અને સ્વાદિષ્ટ વાનગીઓનું ખાસ નિદર્શન તથા વાનગી સ્પર્ધા યોજવામાં આવી હતી.
આ આયોજનનો મુખ્ય હેતુ આંગણવાડીના લાભાર્થીઓ, સગર્ભા, ધાત્રી માતાઓ અને વાલીઓમાં પોષણ પ્રત્યે જાગૃતિ લાવવાનો તેમજ દૈનિક આહારમાં પૌષ્ટિક ધાન્યનો ઉપયોગ વધારવાનો હતો.
આ કાર્યક્રમમાં વઢવાણ ઘટક-2 ના બાળ વિકાસ યોજના અધિકારી જીજ્ઞાસાબેન વાઘેલા, ન્યુટ્રીશન આસિસ્ટન્ટ તેજલબેન તેમજ ICDS વિભાગના કર્મચારીઓ ઉપસ્થિત રહ્યા હતા.
આંગણવાડી વર્કરો અને હેલ્પરો દ્વારા બાજરી, જુવાર, રાગી જેવા મિલેટ્સ તથા THR ના લોટનો ઉપયોગ કરીને વિવિધ વાનગીઓ બનાવીને મનમોહક રીતે રજૂ કરવામાં આવી હતી.
વાનગી સ્પર્ધામાં વાનગીનું પોષણમૂલ્ય, સ્વચ્છતા, સ્વાદ અને પ્રેઝન્ટેશનના આધારે મૂલ્યાંકન કરવામાં આવ્યું હતું.
અધિકારીઓ અને ન્યુટ્રીશન આસિસ્ટન્ટ દ્વારા મિલેટ્સના સેવનથી થતા શારીરિક લાભો અને સુપોષણ અંગે વિસ્તૃત માર્ગદર્શન પૂરું પાડવામાં આવ્યું હતું.
સાથોસાથ, બાળકોને ઘરે પણ THR માંથી સરળતાથી પોષણયુક્ત ખોરાક બનાવી આપવા અંગે જરૂરી પ્રોત્સાહન અને તાલીમ આપવામાં આવી હતી.
