ACB Bribe Case | સુરેન્દ્રનગર મહાનગરપાલિકામાં (SNMC) સિક્યુરિટી સુપરવાઇઝર તરીકે ફરજ બજાવતા અને એન્ટી કરપ્શન બ્યુરો (Anti Corruption Bureau – ACB)ની જાળમાં ફસાયેલા કર્મચારી વિનોદ કિશોરભાઈ પરમાર સામે તપાસ તેજ કરવામાં આવી છે.
રાજકોટની જે. કે. સિક્યુરિટી એજન્સીમાં સુપરવાઇઝર તરીકે કાર્યરત વિનોદ પરમારને ₹2000 ની લાંચ (Bribe) લેતા રંગેહાથ ઝડપી પાડવામાં આવ્યો હતો.
આરોપી નોકરી આપવા, નોકરી પર ચાલુ રાખવા અને સારી જગ્યાએ પોસ્ટિંગ આપવા માટે કર્મચારીઓ પાસેથી દર મહિને ₹1000 થી ₹2000 સુધીના હપ્તા લેતો હોવાનો મોટો ધડાકો થયો છે.
આ કૌભાંડ (Scam) બહાર આવ્યા બાદ એસીબી વિભાગ દ્વારા કડક કાર્યવાહી હાથ ધરવામાં આવી છે. મહાનગરપાલિકાના બગીચા વિભાગ અને પાણી પુરવઠા વિભાગ સહિતની ઓફિસોમાં ફરજ બજાવતા તમામ સિક્યુરિટી ગાર્ડ્સની પૂછપરછ શરૂ કરાઈ છે.
આ મામલે અત્યાર સુધીમાં 28 જેટલા કર્મચારીઓના સત્તાવાર નિવેદન (Statement) લેવામાં આવ્યા છે. વધુમાં, એસીબી દ્વારા સિક્યુરિટી કોન્ટ્રાક્ટ એજન્સીના (Contract Agency) વડાને પણ પૂછપરછ માટે તેડું મોકલવામાં આવ્યું છે. આ ઓપરેશનથી ભ્રષ્ટ તત્વોમાં ભારે ફફડાટ વ્યાપી ગયો છે.
