સુરેન્દ્રનગર જિલ્લામાં હોટલો અને ગેસ્ટ હાઉસમાં ચાલતી ગેરકાયદેસર પ્રવૃત્તિઓ રોકવા માટે એસ.ઓ.જી (SOG) પોલીસ દ્વારા કડક ઝુંબેશ હાથ ધરવામાં આવી છે. પોલીસની ટીમે સુરેન્દ્રનગર શહેરના વિવિધ વિસ્તારોમાં આવેલી હોટલોમાં ઓચિંતું ચેકિંગ હાથ ધર્યું હતું.
આ તપાસ દરમિયાન નિયમોનો ભંગ કરી રહેલા 2 હોટલ સંચાલકો સામે કાયદેસરની કાર્યવાહી કરવામાં આવી છે. પોલીસને શંકા હતી કે કેટલીક હોટલોમાં 18 વર્ષથી નીચેની વયના સગીર યુવક-યુવતીઓને વાલીઓની સંમતિ વગર રૂમ ભાડે આપવામાં આવે છે.
તપાસ દરમિયાન ‘હોટલ ધ પેલેસ’ ના સંચાલક ક્રિપાલસિંહ ભવાનીસિંહ જાડેજા અને ‘હોટલ બ્લુ બર્ડ’ ના સંચાલક દેવાંગભાઈ મનુભાઈ ખાંભલા સામે ગુનો દાખલ કરવામાં આવ્યો છે.
આ હોટલોમાં CCTV કેમેરાનું 1 મહિનાનું રેકોર્ડિંગ ન રાખવા બદલ અને પથિક સોફ્ટવેરમાં ગ્રાહકોની એન્ટ્રી ન કરવા બદલ કાર્યવાહી કરાઈ છે. એસ.ઓ.જી. પોલીસે આ ઉપરાંત સેટર્ન હોટલ, શિવશક્તિ ગેસ્ટ હાઉસ, હર્ષદ ગેસ્ટ હાઉસ અને વૃંદાવન હોટલ સહિતની અનેક હોટલોમાં ચેકિંગ હાથ ધર્યું હતું.
પોલીસ વિભાગ દ્વારા તમામ હોટલ માલિકોને સખત સૂચના આપવામાં આવી છે કે સગીરોને વાલીની સંમતિ વગર રૂમ આપવા નહીં. ગેરકાયદેસર હેતુ માટે હોટલનો ઉપયોગ કરનારા સામે કડક પગલાં લેવામાં આવશે. વધુમાં, દરેક મુસાફરની વિગતો પથિક સોફ્ટવેરમાં ફરજિયાત એન્ટ્રી કરવા અને સુરક્ષાના ભાગરૂપે સીસીટીવી રેકોર્ડ જાળવી રાખવા તાકીદ કરવામાં આવી છે.
