સુરેન્દ્રનગર જિલ્લામાં વધતી જતી ચોરીની ઘટનાઓને અંકુશમાં લેવા માટે પોલીસ વિભાગ દ્વારા સઘન કાર્યવાહી હાથ ધરવામાં આવી છે. મોડી રાત્રે કોમ્બિંગ નાઈટ અને પેટ્રોલિંગ દરમિયાન સુરેન્દ્રનગર લોકલ ક્રાઈમ બ્રાન્ચ (LCB) ની ટીમને મોટી સફળતા મળી છે.
પાણશીણા પોલીસ સ્ટેશનમાં નોંધાયેલા સોલાર પેનલ ચોરીના ગુનાનો ભેદ ઉકેલીને પોલીસે ચોરી કરતી ટોળકીને ઝડપી પાડી છે. કટારીયા ગામની સીમમાં થયેલી આ ચોરીના મામલે પોલીસે ટેકનિકલ સોર્સ અને હ્યુમન ઇન્ટેલિજન્સની મદદથી તપાસ તેજ કરી હતી.
તપાસ દરમિયાન પોલીસે શંકાસ્પદ (1) સહદેવભાઈ ઉર્ફે ભૂરો દિલીપભાઈ પરનાળીયાની અટકાયત કરી પૂછપરછ હાથ ધરી હતી. પોલીસની કડક પૂછપરછમાં (2) દેવરાજ ઉર્ફે બહાદુરભાઈ ધનજીભાઈ પરનાળીયા અને (3) કિશોર ઉર્ફે કાનાભાઈ બારડના નામો ખુલ્યા હતા.
આ ટોળકીએ અલગ-અલગ સ્થળોએ છુપાવેલી 24 નંગ સોલાર પેનલ પોલીસે રિકવર કરી છે, જેની બજાર કિંમત અંદાજે 2.16 લાખ રૂપિયા થાય છે. હાલ LCB દ્વારા આ ટોળકીએ અન્ય કોઈ સ્થળોએ ચોરી કરી છે કે કેમ તે દિશામાં તપાસ શરૂ કરવામાં આવી છે.
