સુરેન્દ્રનગર મહાનગરપાલિકા દ્વારા ઉત્તર ઝોન કચેરી ખાતે યોજવામાં આવેલા સેવા સેતુ કાર્યક્રમમાં ગેરવ્યવસ્થાને લઈને અરજદારોએ ભારે હોબાળો મચાવ્યો હતો.
આ કાર્યક્રમમાં 1044 જેટલી અરજીઓ આવી હતી, પરંતુ જાતિ અને આવકના દાખલા, આધારકાર્ડ સુધારો તથા સમાજ કલ્યાણ વિભાગની યોજનાઓનો લાભ લેવા આવેલા લોકોને પૂરતા જવાબ ન મળતા રોષ જોવા મળ્યો હતો. તંત્ર દ્વારા પૂરતી વ્યવસ્થા કરવામાં નિષ્ફળતા મળતા લોકોએ આક્ષેપ કર્યો હતો કે તેમને કામના બદલે ધક્કા ખવડાવવામાં આવી રહ્યા છે.
સેવા સેતુના સ્થળે ઝેરોક્ષ મશીન જેવી પાયાની સુવિધા ન હોવાથી અરજદારોને ધોમધખતા તડકામાં દૂર સુધી જવું પડ્યું હતું. આ ઉપરાંત, કમ્પાઉન્ડનું લેવલ યોગ્ય ન હોવાથી અનેક લોકો નીચે પડી ગયા હોવાની ઘટનાઓ પણ બની હતી.
મામલતદાર કચેરી દ્વારા ફોર્મ વિતરણ કરાયા બાદ ફરી ઓફિસે બોલાવવામાં આવતા અરજદારો મજબૂર બન્યા હતા. સ્થાનિકોએ માંગ કરી છે કે તંત્ર કાર્યક્રમના નામે દેખાવો કરવાને બદલે પહેલા યોગ્ય વ્યવસ્થા ઉભી કરે જેથી સામાન્ય જનતાને હાલાકી ભોગવવી ન પડે.
