સુરેન્દ્રનગર જિલ્લાના થાન શહેરના પીપળાવાળા ચોક પાસે આવેલા ઓવરબ્રિજ (Overbridge) પર રવિવારે મોડી રાત્રે એક મોટી દુર્ઘટના ટળી હતી. એક વાહન ચાલક પોતાનું થ્રેશર મશીન (Thresher Machine) લઈને ઓવરબ્રિજ પરથી પસાર થઈ રહ્યો હતો, ત્યારે વાહનની ઊંચાઈ વધુ હોવાને કારણે તે બ્રિજની શરૂઆતમાં લગાવેલા લોખંડના હાઇટગેજ (Height Gauge) પાઇપમાં ફસાઈ ગયું હતું. આ ઘટનાને પગલે ઓવરબ્રિજ પરનો વાહન વ્યવહાર (Traffic) કલાકો સુધી ખોરવાઈ ગયો હતો.
સ્થાનિકોના જણાવ્યા મુજબ, ઓવરબ્રિજની એક તરફ એટલે કે પીપળાવાળા ચોક પાસે હાઇટગેજ લગાવેલો છે, પરંતુ બીજી તરફ એક્સિસ બેંક પાસે ઉતરતી વખતે આવો કોઈ પાઇપ કે ચેતવણી આપતું બોર્ડ (Signboard) લગાવેલું નથી. આ અસમાનતાને કારણે મોટા વાહનોના ચાલકોને અંદાજ આવતો નથી અને તેઓ અધવચ્ચે ફસાઈ જાય છે. રવિવારની આ ઘટનામાં સ્થાનિકોની ભારે જહેમત બાદ ફસાયેલા વાહનને સુરક્ષિત રીતે બહાર કાઢવામાં આવ્યું હતું. સ્થાનિક રહીશોએ માગ કરી છે કે તંત્ર દ્વારા તાત્કાલિક ધોરણે બ્રિજની બંને બાજુ ઊંચાઈ માપવાના પાઇપ અને જરૂરી સૂચના બોર્ડ લગાવવામાં આવે જેથી ભવિષ્યમાં આવા ટ્રાફિકજામ (Traffic Jam) નિવારી શકાય.
