સુરેન્દ્રનગર શહેરી વિસ્તારમાં અસામાજીક પ્રવૃતિઓ આચરતા તત્વો અને વીજ ચોરી કરનારાઓ વિરૂદ્ધ પોલીસ તંત્ર અને PGVCL ની ટીમ દ્વારા એક મોટું સંયુક્ત મેગા કોમ્બિંગ ઓપરેશન હાથ ધરવામાં આવ્યું હતું.
આ ડ્રાઇવ અંતર્ગત સુરેન્દ્રનગર એ-ડિવિઝન પોલીસ મથકની હદમાં આવેલા મિયાણાવાડ, લક્ષ્મીપરા, પોપટપરા અને કૃષ્ણનગર સહિતના સંવેદનશીલ વિસ્તારોને આવરી લેવામાં આવ્યા હતા.
આ મેગા ઓપરેશનમાં ASP વેદિકા બિહાનીના નેતૃત્વ હેઠળ એ-ડિવિઝન પોલીસ અને LCB ટીમના 100 થી વધુ પોલીસ કર્મચારીઓ તેમજ PGVCL ની 40 અલગ-અલગ ટીમો જોડાઈ હતી. આ સંયુક્ત ચેકીંગ દરમિયાન સમગ્ર પંથકમાં વીજ ચોરો અને ગુનેગારોમાં ભારે ફફડાટ ફેલાઈ ગયો હતો.
સંયુક્ત ટીમ દ્વારા આ વિસ્તારોમાં આવેલા કુલ 125 ઘરોમાં સઘન વીજ ચેકીંગ પ્રક્રિયા હાથ ધરવામાં આવી હતી. જેમાંથી ચોંકાવનારી રીતે કુલ 84 ઘરોમાં ગેરકાયદેસર રીતે વીજ જોડાણ મેળવીને મોટા પાયે વીજ ચોરી થતી હોવાનું સામે આવ્યું હતું.
આ વિસ્તારોમાં અમુક લોકો દ્વારા ડાયરેક્ટ વીજ થાંભલામાંથી કનેક્શન લઈને અથવા તો લંગરિયા નાખીને પાવર ચોરી કરવામાં આવતો હતો. આ તમામ 84 ઘરોને PGVCL દ્વારા અંદાજે Rs 1.25 કરોડથી વધુ રકમનો મસમોટો દંડ ફટકારીને કાયદેસરની કાર્યવાહી કરવામાં આવી છે.
આ વીજ ચેકીંગ ડ્રાઇવની સાથે-સાથે પોલીસે આ વિસ્તારોમાં રહેતા બુટલેગરો, હિસ્ટ્રીશીટરો અને અસામાજીક પ્રવૃતિઓ સાથે સંકળાયેલા શખ્સોના ઘરોમાં પણ કડક તપાસ હાથ ધરી હતી. આ સર્ચ ઓપરેશન દરમિયાન પોલીસે અલગ-અલગ ગુનાઓમાં નાસતા ફરતા કુલ 08 જેટલા વોન્ટેડ આરોપીઓને ઝડપી પાડ્યા હતા.
પકડાયેલા ગુનેગારોમાં એક કુખ્યાત આરોપી પણ સામેલ છે, જેની વિરૂદ્ધ અગાઉ 03 જેટલા વોરંટ ઈસ્યુ થયેલા હતા અને તેની સામે 06 જેટલા ગંભીર ગુનાઓ નોંધાઈ ચૂક્યા છે. પોલીસે તમામ આરોપીઓની ધરપકડ કરી આગળની કાર્યવાહી શરૂ કરી છે.
