Surendranagar Anti Encroachment Drive | સુરેન્દ્રનગર શહેરી વિસ્તારના મુખ્ય માર્ગો પર સતત વધી રહેલા ગેરકાયદેસર દબાણોને કારણે રોડ રસ્તાઓ સાંકડા થઈ ગયા હતા. આ દબાણોના લીધે વાહનોના ટ્રાફિક જામની ગંભીર સમસ્યા સર્જાતી હતી અને વાહનચાલકો તેમજ રાહદારીઓને ભારે હાલાકીનો સામનો કરવો પડતો હતો.
આ બાબતે શહેરના જાગૃત નાગરિકો દ્વારા સુરેન્દ્રનગર જિલ્લા કલેક્ટર અને મહાનગરપાલિકાના કમિશનરને લેખિતમાં રજૂઆત કરીને તાત્કાલિક દબાણો હટાવવાની માંગ કરવામાં આવી હતી. નાગરિકોની આ રજૂઆતના પગલે તંત્ર દ્વારા કડક પગલાં લેવાનું શરૂ કરવામાં આવ્યું છે.
સુરેન્દ્રનગર મહાનગરપાલિકાની દબાણ વિભાગની ટીમ દ્વારા પોલીસ બંદોબસ્ત સાથે કલેક્ટર કચેરીથી લઈને દૂધરેજ સુધીના વિસ્તારમાં મેગા ડ્રાઈવ યોજવામાં આવી હતી.
આ કામગીરી દરમિયાન રસ્તા પર નડતરરૂપ એવા કુલ 47 જેટલા ગેરકાયદેસર દબાણો તોડી પાડીને દૂર કરવામાં આવ્યા હતા, જેમાં પાકા કેબિન, લારી-ગલ્લા અને દુકાનોની બહાર લગાવેલા કાપડના શેડનો સમાવેશ થાય છે.
આ ઉપરાંત ટ્રાફિકને અવરોધતી 8 જેટલી લારીઓ પણ જપ્ત કરવામાં આવી હતી. આ કાર્યવાહી દરમિયાન નિયમભંગ કરનારાઓ પાસેથી 5,000 રૂપિયાનો દંડ વસૂલવામાં આવ્યો હતો.
આગામી સમયમાં પણ શહેરના રસ્તાઓ ખુલ્લા અને ટ્રાફિકમુક્ત બને તે માટે મહાનગરપાલિકા દ્વારા આ ઝુંબેશ ચાલુ રાખવામાં આવશે.
