સુરેન્દ્રનગરમાં નશીલા પદાર્થોના વેચાણની રજૂઆત, ખંભાળિયા પોલીસને તપાસ સોંપાઈ

સુરેન્દ્રનગર (Surendranagar) શહેરી વિસ્તારમાં દારૂ, ડ્રગ્સ (Drugs), ચરસ અને ગાંજા જેવા ઘાતક નશીલા પદાર્થોનું ખુલ્લેઆમ વેચાણ થતું હોવાની ગંભીર બાબતે જાગૃત નાગરિકો દ્વારા જિલ્લા કલેક્ટર અને જિલ્લા પોલીસ વડા (SP) ને લેખિત રજૂઆત કરવામાં આવી હતી.

ભાવનગરમાં સર્જાયેલા લઠ્ઠાકાંડ જેવી ગંભીર ઘટના સુરેન્દ્રનગરમાં ન બને તે માટે બુટલેગરો સામે કડક કાર્યવાહી કરવા માંગ કરાઈ હતી.

આ મુદ્દે સ્થાનિક B-ડિવિઝન પોલીસ (B Division Police) સ્ટેશને અરજદાર અને જાગૃત નાગરિક જીગ્નેશ મેમકીયાને બોલાવીને પ્રાથમિક જવાબ નોંધ્યા હતા. ત્યારબાદ રેન્જ પોલીસ વિભાગ દ્વારા આ સમગ્ર મામલાની નિષ્પક્ષ તપાસ ખંભાળિયા પોલીસ સ્ટેશનના PI સી.આર. રાણાને સોંપવામાં આવી છે.

હવે આ કેસ અંગે આગળની કાર્યવાહી દ્વારકા (Dwarka) જિલ્લાની ખંભાળિયા પોલીસ કરશે. તપાસ અધિકારી દ્વારા અરજદાર જીગ્નેશ મેમકીયાને 1 સમન્સ પાઠવીને 5 દિવસમાં ખંભાળિયા પોલીસ સ્ટેશન સમક્ષ હાજર રહી નશીલા પદાર્થોના વેચાણ અંગેનો વિસ્તૃત જવાબ લખાવવા સૂચના આપવામાં આવી છે.

તંત્ર દ્વારા નિષ્પક્ષ તપાસ માટે અન્ય જિલ્લાની પોલીસને કામગીરી સોંપાઈ છે, પરંતુ સુરેન્દ્રનગરના સ્થાનિક રજૂઆતકર્તાઓને હવે જવાબ આપવા માટે ખંભાળિયા સુધી જવું પડશે. જેથી જાગૃત નાગરિકોને લાંબા થવાની સ્થિતિ સર્જાઈ હોવાની ચર્ચા જાગી છે.